Կոտայքի մարզպետ Ռոմանոս Պետրոսյանը դիմել է վարչական դատարան՝ պահանջելով անվավեր ճանաչել Նոր Գեղի համայնքի ավագանու՝ 4 տարի առաջ կայացրած որոշումը, համաձայն որի՝ համայնքի մի շարք փողոցներ անվանվել են նախկին համայնքապետ Ֆրոնտիկ Թևոսյանի անունով:

Թեմայի շուրջ SHANTNEWS.am-ը զրուցեց Կոտայքի մարզպետ Ռոմանոս Պետրոսյանի հետ:

Ռոմանոս Պետրոսյանը նշեց, որ ըստ իր ունեցած տեղեկությունների՝ սա մարզի միակ համայնքն է, և ինքն այս հարցի մասին իմացել է մարզպետ նշանակվելու հենց առաջին օրվանից.

«Նա 1985թ -ից այդ համայնքի ղեկավարն է եղել տարբեր կարգավիճակներով: Իր անունով է անվանակոչվել շուրջ 18 մեծ և փոքր փողոց: Հատկանշական է, որ Արագածոտն գնացող գլխավոր պողոտան ևս կոչված է Ֆրոնտիկ Թևոսյանի անունով: Օրենքով սահմանված կարգով՝ ես 2 անգամ ավագանուն առաջարկել են չեղարկել որոշումը»:

Մարզպետի խոսքով՝ ըստ անվանակոչման մասին օրենքի՝ փողոցը մարդու անունով կարելի է վերանվանել մահվանից 5 տարի հետո, կամ էլ այն դեպքում, երբ նա անուրանալի ծառայություն է մատուցել:

Ռոմանոս Պետրոսյանն ասաց, որ 2 ամիս աշխատել է Ֆրոնտիկ Թևոսյանի հետ և վերջինիս հարցրել, թե ինչո՞ւ է այդպես վարվել. «Փոքրիկ գաղտնիք բացեմ. 18 փողոցներից բացի, Նոր Գեղիում կա նաև Ֆրոնտիկ Թևոսյանի անվան արվեստի դպրոց»:

Լուսանկարը՝ «Մեդիալաբ»-ի: