Պետական վերահսկողական ծառայության պետի տեղակալ Արգիշտի Քարամյանն այսօր կառավարությունում լրագրողների հետ ճեպազրույցում հերքեց տեղեկությունները, թե ինքը քավոր-սանիկական հարաբերություններ ունի նախկին ոստիկանապետ Վլադիմիր Գասպարյանի հետ։ «Փոխադարձ հարգանքի հիման վրա հարաբերություններ ունեմ պարոն Գասպարյանի հետ, բայց քավոր-սանիկական հարաբերություններ մենք չունենք։ Եթե ունենայի, կբարձրաձայնեի այդ մասին»,- ասաց Քարամյանը։ Նա նշեց, որ նախկինում աշխատել է ոստիկանությունում, քննչական կոմիտեում, դատախազությունում, և Գասպարյանի հետ «փոխադարձ հարգալից» հարաբերությունները հորդորեց դիտարկել այդ համատեքստում։ Լրագրողները նաև հետաքրքրվեցին, թե որտեղի՞ց է ՊՎԾ պետի տեղակալը հայտարարագրել 32 մլն դրամ և 46 հազար ԱՄՆ դոլար եկամուտ, ինչին պաշտոնյան պատասխանեց. «Ես կարծում եմ, որ զուտ էթիկայի տեսանկյունից այնքան էլ ճիշտ չէ քննարկել որևէ մեկի ունեցավծքն ու կարողությունը։ Ես նախկինում աշխատել եմ տարբեր ուժային կառույցներում, զբաղեցրել եմ տարբեր պաշտոններ։ Պաշտոնապես հայտարարում եմ՝ երբևէ որևէ կոռուպցիոն սկանդալի մեջ չեմ եղել, որևէ կլանային համակարգում չեմ եղել, բիզնեսով էլ չեմ զբաղվել։ Կոռեկտ չեմ համարում քննարկել իմ ունեցվածքը»։