5 հազար դրամանոցները շրջանառությունից չեն հանվի. ԿԲ-ն պարզաբանել է, թե ինչ է պատկերված դրա վրա

Երբ հուշարձանագետ Սամվել Կարապետյանն ասում է, որ 5 հազար դրամանոց թղթադրամի վրա ԿԲ-ն փորձել է եկեղեցի պատկերել, փոխարենը Շերեֆ խան Դ-ի դամբարանն է պատկերել, դա սուբյեկտիվ մեկնաբանություն է, որովհետև ոչ մի տեղ չի ասվում, որ մենք ցանկացել ենք եկեղեցի ցույց տալ։ Մենք ներկայացրել ենք Բաղեշ քաղաքի՝ 20-րդ դարասկզբի հայտնի համայնապատկերներից մեկը՝ 5 լուսանկար, որոնք որոշակի մշակման ադյունքում ստացել են այն տեսքը, որն առկա է։ Aysor. am-ի թղթակցի հետ զրույցում այս մասին ասաց ՀՀ կենտրոնական բանկի հասարակայնության հետ կապերի ծառայության ղեկավար Հարություն Բերբերյանը՝ անդրադառնալով հուշարձանագետի ֆեյսբուքյան այն գրառմանը, որ «անգիտության և անհոգ փնթիության հետևանքով նորատիպ 5 հազար դրամանոցներով մահմեդախան խանի դամբարանն ենք գովազդում»։ Բերբերյանի խոսքով, ՀՀ կենտրոնական բանկը, երրորդ սերնդի թղթադրամները դեռևս շրջանառության մեջ դնելուց առաջ, իր պաշտոնական կայքում հրապարակել է դրանց մասին հիմնական նկարագրությունը, որը ներառում է թղթադրամների չափի, հիմնական գունային գամմայի, դիմերեսի և դարձերեսի պատկերների մասին ինֆորմացիա։ «Կոնկրետ 5 հազար դրամանոցի մասին կարդում ենք, որ դիմերեսին Վիլյամ Սարոյանի դիմանկարն է, որի ֆոնին հատվածներ են հեղինակի «Նռնենիները» պատմվածքի նկարազարդումներից, հայկական լեռների ու նռնենիների պատկերներ են։ Դարձերեսին Վիլյամ Սարոյանի արձանն է Երևանում, որի ֆոնին իր նախնիների ծննդավայր Բաղեշի՝ 20-րդ դարի համայնապատկերն է», - ասաց մեր զրուցակիցը։ ԿԲ հասարակայնության հետ կապերի ծառայության ղեկավարի համոզմամբ, Սամվել Կարապետյանի ֆեյսբուքյան գրառումը, շնորհիվ հուզական էլեմենտներ պարունակելու, հասել է իր նպատակին, սակայն իրենք ի սկզբանե ցանկություն կամ միտում չեն ունեցել ցույց տալ Բաղեշ քաղաքը՝ եկեղեցով։ Հարություն Բերբերյանը միաժամանակ նշեց, որ Կենտրոնական բանկը չի պատրաստվում թղթադրամի նկարազարդումների մեջ փոփոխություն կատարել կամ դրանք շրջանառությունից հանել։