Բաքուն Ռուսաստանից անհապաղ քայլեր է պահանջել. դեսպանը կանչվել է ԱԳՆ

Ադրբեջանում Ռուսաստանի դեսպան Միխայիլ Եվդոկիմովին հրավիրել են արտաքին գործերի նախարարություն։

ԱՊԱ-ի փոխանցմամբ՝ Ադրբեջանի ԱԳՆ-ում կայացած հանդիպմանը ռուսական կողմին է ներկայացվել ադրբեջանական կողմի խոր անհանգստությունն ու վճռական բողոքը, որոնք պատճառահետևանքային կապ ունեն ռուսաստանյան լրատվական ու տեղեկատվական դաշտում Ադրբեջանի Հանրապետության, ադրբեջանցի ժողովրդի և երկրի ղեկավարության հասցեին վերջին շրջանում արված սադրիչ, վիրավորական ու սպառնալից հայտարարությունների հետ։

Առանձնահատուկ անդրադարձ է կատարվել 2026 թվականի օգոստոսի 13-ին «Չիստոտա պոնիմանիյա» նախագծի շրջանակում եթեր հեռարձակված հաղորդման ժամանակ Ադրբեջանի, նրա ժողովրդի և պետության ղեկավարության հասցեին արտահայտված մտքերին։

Բացի այդ, նշվել են օգոստոսի 7-ին «Սպուտնիկ» ռադիոյի եթերում հնչած աբսուրդային հայտարարությունները՝ Ադրբեջանի ղեկավարությանը «Ռուսաստանի ահաբեկիչների և ծայրահեղականների ցուցակում» ընդգրկելու մասին, ինչպես նաև օգոստոսի 9-ին Յութուբում և օգոստոսի 16-ին «Սպաս» հեռուստաընկերությամբ Ադրբեջանի ղեկավարության հասցեին վիրավորական բովանդակությամբ նյութերի ու սադրիչ արտահայտությունների տարածումը։

Շեշտվել է, որ Ադրբեջանի ներքաղաքական գործընթացներին միջամտելու հնարավորությունների քննարկումը, ինչպես նաև ադրբեջանցի ժողովրդի և Ադրբեջանի ղեկավարության հանդեպ ֆիզիկական հաշվեհարդարի կոչերն անընդունելի են։

Ընդգծվել է, որ լուրջ մտահոգություն է առաջացնում նման հռետորաբանության շարունակումն առավել կոշտ ձևով՝ չնայած նմանատիպ գործողությունները կանխելու վերաբերյալ ադրբեջանական կողմի բազմաթիվ կոչերին և տարբեր քաղաքական մակարդակներում սույն հարցի քննարկմանը։

Զրույցի ընթացքում ռուսական կողմին կրկին հասցվել են Ադրբեջանի ակնկալիքները՝ ռուսաստանյան տեղեկատվական և մեդիա տիրույթում Ադրբեջանի հասցեին սադրիչ, սպառնալից ու բռնի հռետորաբանությունը դադարեցնելու նպատակով անհապաղ և արդյունավետ քայլեր ձեռնարկելու վերաբերյալ։