Ինչո՞ւ է բենզինը թանկանում Հայաստանում․ ՄՊՀ նախագահը բացահայտում է պատճառը

Հայաստանում վերջին օրերին արձանագրված բենզինի թանկացման պատճառը համաշխարհային շուկայում տեղի ունեցող փոփոխություններն են։

Մրցակցության պաշտպանության հանձնաժողովի նախագահ Գեղամ Գևորգյանը հուլիսի 30-ին լրագրողների հետ զրույցում հայտնել է, որ Հայաստանում վառելիքի գնային դինամիկան վերջին տարիներին ընդհանուր առմամբ համահունչ է եղել համաշխարհային միտումներին։ Նա նշել է, որ ներկրման աղբյուրների դիվերսիֆիկացիայի շնորհիվ հնարավոր է եղել ապահովել որոշակի գնային մրցունակություն։

Գևորգյանի պարզաբանմամբ՝ հանձնաժողովը իրականացնում է ամենամսյա մոնիթորինգ՝ հետևելով թե՛ գներին, թե՛ ծավալներին։ Նա ընդգծել է, որ աշխարհում ընթացող փոփոխությունների պատճառով բենզինի և դիզելային վառելիքի շուկաները գտնվում են անկայուն վիճակում, ինչն էլ հանգեցրել է գների որոշակի աճի։

ՄՊՀ նախագահի խոսքով՝ ներկայումս խոսքը վերջին երկու-երեք օրերին նկատված փոփոխությունների մասին է, և վերջնական պատկերը դեռ պետք է գնահատվի։

Անդրադառնալով Ռուսաստանից վառելիքի մատակարարումների կրճատմանը՝ Գևորգյանը նշել է, որ ռուս-ուկրաինական պատերազմով պայմանավորված խնդիրներն այդ ուղղությամբ առկա են արդեն մի քանի տարի։

«Արդեն մոտ երկու-երեք տարի է՝ մենք Ռուսաստանից գրեթե բենզին չենք ներկրում։ Ընդ որում, դիզելային վառելիքի մատակարարումների հետ կապված խնդիրներ նույնպես եղել են», — հայտարարել է Գևորգյանը։