Ովքե՞ր են նորընտիր ԱԺ-ի ամենահարուստ պատգամավորները․ Civilnet

2026-ի հունիսի 7-ի խորհրդարանական ընտրությունների արդյունքում ձևավորված 9-րդ գումարման Ազգային ժողովում «Քաղաքացիական պայմանագիրը» (ՔՊ) կունենա 64 մանդատ, «Ուժեղ Հայաստան» դաշինքը՝ 29 մանդատ, և «Հայաստան» դաշինքը՝ 12 մանդատ: ՍիվիլՆեթն ուսումնասիրել է նորընտիր ԱԺ-ի պատգամավորների ամենաթարմ հայտարարագրերը, որոնք նրանք ներկայացրել էին ընտրություններից առաջ Կենտրոնական ընտրական հանձնաժողովին։ Այս հայտարարագրերը ներառում են 2025-ի ապրիլի 1-ից մինչև 2026-ի նույն ժամանակահատվածը պատգամավորների գույքի և եկամուտների մասին տվյալները։ Մենք յուրաքանչյուր խմբակցությունից առանձնացրել ենք ամեահարուստ երեք պատգամավորներին։

«Քաղաքացիական պայմանագիր» 

«Քաղաքացիական պայմանագրի» նորընտիր պատգամավորների մեջ ամենահարուստներից Ռուստամ Բաքոյանն է՝ ազգային փոքրամասնության ցուցակով ընտրված թեկնածուներից մեկը։ Նա հայտարարագրել է շուրջ 140 մլն դրամ և 46,000 դոլար։ Այս գումարը Բաքոյանը վաստակել է ոչ թե Ազգային ժողովի պատգամավորի աշխատավարձից, այլ գյուղատնտեսական գործունեությունից։ ԱԺ պատգամավորի աշխատավարձից նա ստացել է ավելի քան 14 մլն դրամ եկամուտ։

Բաքոյանն ունի մեկ բնակարան Երևանի Նորք-Մարաշ վարչական շրջանում (55 քմ) և անհատական բնակելի տուն Արարատի մարզի Նոր կյանք գյուղում (322 քմ)։

ՔՊ-ի պատգամավորների շարքում երկրորդ ամենահարուստն է Գոռ Արշակյանը, որը մինչ այս զբաղեցրել է «Արագածոտն» ջրօգտագործողների ընկերության գործադիր տնօրենի պաշտոնը։ Նա հայտարարագրել է 14,3 մլն դրամ բանկային ավանդ, ինչպես նաև կանխիկով՝ 17 մլն դրամ ու 5,000 դոլար։ Անշարժ գույքից ունի բնակելի տներ Արագածոտնի մարզի Աշտարակ քաղաքում, շինություն և հողամաս նույն մարզում և մեկ բնակարան Երևանի Մալաթիա-Սեբաստիա վարչական շրջանում։

ՀՀ ԳԱԱ Ռադիոֆիզիկայի և էլեկտրոնիկայի ինստիտուտի տրանսպորտի տեղամասի պետ և անհատ ձեռնարկատեր Տիգրան Գալստյանը երրորդն է այս ցուցակում։ Նրա դրամական միջոցները կազմել են 13,6 մլն դրամ, 31,800 ԱՄՆ դոլար և 2,600 եվրո։ Նա երկու անձանցից յուրաքանչյուրից ավելի քան 9,000 դոլար նվիրատվություն է ստացել։ Նորընտիր պատգամավորն ունի հողամասեր Արագածոտնի մարզի Աշտարակ քաղաքում, հասարակական նշանակության շինություններ ու բնակարան։

«Ուժեղ Հայաստան» 

«Ուժեղ Հայաստան» դաշինքի պատգամավորների ամենահարուստ հնգյակը գլխավորում է այս քաղաքական ուժի ղեկավար, գործարար Սամվել Կարապետյանի եղբոր որդին՝ Նարեկ Կարապետյանը։ Կարապետյանը հայտարարագրել է 16,5 մլն դրամ, ավելի քան 1,8 մլն դոլար և 2,1 մլն եվրո։ Նա տիրապետում է Լոռու մարզում գտնվող մի շարք հողամասերի (ընդհանուր առմամբ շուրջ երկու հեկտար), ինչպես նաև ունի երկու փոխադրամիջոց՝ Mercedes-Benz S580 Maybach (2021 թ.) և Toyota Camry 2.5 (2025 թ.)։

Կարապետյանը եկամուտ է ստացել «Տաշիր Կապիտալից»՝ որպես աշխատավարձ, ինչպես նաև ստացել է շուրջ 56,2 մլն դրամ նվիրատվություն Արթուր Հովագիմյանից։ Նա «Տաշիր Ագրո» ընկերության 100 տոկոսանոց, «Սյունէներգաշին» ընկերության գրեթե ամբողջական և «Ռի Թաուեր» ընկերության կես մասնաբաժնի սեփականատերն է։ Նա նաև ամենահարուստն է նոր ձևավորվող խորհրդարանի բոլոր պատգամավորների ցանկում։

Երկրորդն է Դավիթ Ղազինյանը, որը հայտարարագրել է 100 մլն դրամ, 200,000 դոլար և 50,000 եվրո դրամական միջոցներ։ Ղազինյանն ունի մի քանի անշարժ գույքեր Երևանում՝ այդ թվում բնակելի տներ Քանաքեռ-Զեյթունում և Արաբկիրում, հողամաս Աշտարակում, ինչպես նաև Կոտայքի մարզում գտնվող հողամասեր։ Նրա ավտոպարկում են BYD Sea Lion 06 EV (2025 թ.), Lixiang L9 Ultra 1.5 Plug-in Hybrid (2024 թ.), Volkswagen ID6 Crozz Pro (2022 թ.) և Toyota Camry 2.0 (2018 թ.)։ Ղազինյանը «Հրազդանի էներգետիկ կազմակերպությունից» ստացել է շուրջ 19,6 մլն դրամ աշխատավարձ և չորս ընկերություններում ունի տարբեր չափի բաժնեմասեր։

Երրորդն է Արամ Վարդևանյանը՝ Սամվել Կարապետյանի պաշտպանը և «Ջեն Ֆի ֆինանսատեխնական գրասենյակ» ընկերության հիմնադիր-փաստաբանը։ Նա հայտարարագրել է 175 մլն դրամ և 29,000 դոլար կանխիկ։ Վարդևանյանն ունի ավտոկայանատեղի և երկու բնակարան Երևանում (գնման պայմանագրերով), ինչպես նաև երկու մեքենա՝ BYD Yuan Plus (2024 թ.) և Lexus RX 350 (2022 թ.)։ 

Նրա եկամուտների աղբյուրների թվում են «Նաիրի Ինշուրանս» ընկերությունը (ընկերության իրական շահառուներից է ՀՀ երկրորդ նախագահի որդին՝ Լևոն Քոչարյանը), «Տաշիր Կապիտալը» և «Ջեն Ֆի» գրասենյակը, որտեղից ստացել է աշխատավարձ, ինչպես նաև «Էրեբունի Պլազա» ընկերությունից ստացած գումար։ Նա հանդիսանում է «Ջեն Ֆի ֆինանսատեխնական գրասենյակ» ընկերության 67%-անոց մասնաբաժնի սեփականատեր։

«Հայաստան» դաշինք

Ինչքան էլ տարօրինակ է, «Հայաստան» դաշինքի ամենահարուստ մարդը ոչ թե ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանն է, այլ պատգամավոր Լիլիթ Գալստյանը։ Նա ունի ավանդ՝ 20,5 մլն դրամի և 138,000 դոլարի չափով, ինչպես նաև կանխիկ 2 մլն դրամ, բացի այդ՝ 795 եվրո ու 265 դոլար։ Եկամուտների մեծ մասը գոյացել է ԱԺ պատգամավորի աշխատավարձից՝ 14 մլն դրամ մեկ տարում, իսկ Հայէկոնոմ բանկի ավանդից՝ 2,6 մլն դրամ։ Ունի նաև երկու բնակարան Երևանում՝ Պարոնյան և Վարդանանց փողոցներում, որոնցից մեկը միանձնյա սեփականություն է։

Հաջորդը Ազգային ժողովում առաջինը մուտք գործող Երևանի ավագանու անդամն է՝ «Անի» ԲԲԸ-ի գլխավոր տնօրեն Մեսրոպ Մանուկյանը։ Նա հայտարարագրել է 57,1 մլն դրամ, 20,000 եվրո ու 21,200 դոլար։ Այդ նույն ընկերությունում ունի 14,02 տոկոս բաժնեմաս, որից և ընկերության տնօրենի պաշտոնի աշխատավարձից ստացել է ավելի քան 144 մլն դրամ եկամուտ մեկ տարում։

Երրորդ հորիզոնականում Արթուր Խաչատրյանն է, որը հայտարարագրել է ավելի քան 22 մլն դրամ (անկանխիկ և կանխիկ) և 18,000 ԱՄՆ դոլար (ավանդի և ընթացիկ հաշվի գումարը)։ Անշարժ գույքից նա ունի բնակարան և ավտոկայանատեղի Երևանի Ադոնցի փողոցում, բնակելի տան բաժնեմաս Կոնդում և հողամաս Եղվարդում, իսկ շարժական գույքից՝ Mitsubishi Pajero 3.5 (2013 թ.) մեքենան։ Նա նաև չգործող «Ագրիմակ» ՍՊԸ-ի 100% բաժնեմասի սեփականատերն է։

Ուշագրավ փաստեր նորընտիր պատգամավորների հայտարարագրերից

ՔՊ-ական Լևոն Լևոնյանը, որը Երևանի ավագանու անդամ էր, ինչպես նաև զբաղեցնում էր ՀՀ բնապահպանության և ընդերքի տեսչական մարմնի ղեկավարի պաշտոնը, հայտարարագրել է կրիպտոարժույթ՝ 1,5 եթերիում, որի արժեքը ներկայում 1 մլն դրամ է։ ՔՊ-ից կան պատգամավորներ, ովքեր ունեն բնակարան կամ ավտոմեքենա, սակայն դրամական միջոցների բաժինը թողել են ամբողջությամբ դատարկ (0 դրամ)։ Այդպիսիք են, օրինակ, Արուսյակ Մանավազյանը, Ծովինար Վարդանյանը և Արփինե Դավոյանը։

Ուժեղ Հայաստանից Դավիթ Ղազինյանը հայտարարագրել է 10 միլիոն դրամ արժողությամբ «Breguet Marine» մոդելի ձեռքի ավտոմատ ժամացույց։ Իսկ Գրիշա Թամրազյանը հայտարարագրել է 22,000 ԱՄՆ դոլար արժողությամբ «Hublot Big Bang Aero Bang» ժամացույց։

Այս ցանկում կան թեկնածու ներկայանալու պահին չաշխատող, բայց մեծ կարողության տեր անձինք, օրինակ՝ Գրիշա Թամրազյանը հայտարարագրում նշել էր, որ չի աշխատում, սակայն ունի մոտ 101 մլն դրամ դրամական միջոց և 22 հազար դոլարանոց ժամացույց։ Վաղինակ Վարդանովը (հայրը ռազմական գործիչ, հետախույզ, «Ողջ մնալու արվեստ» ռազմահայրենասիրական կազմակերպության հիմնադիր Վովա Վարդանովն է) նույնպես նշել էր, թե չի աշխատում, սակայն մեկ տարվա մեջ ստացել է մոտ 65 միլիոն դրամի եկամուտ (հիմնականում փոխառություններից/վարկերից) և հայտարարագրել է 3 մեծ ամենագնաց (Jeep, Ford, Toyota)։

Նարեկ Կարապետյանն էլ ֆիզիկական անձից ստացել է ավելի քան 56 մլն դրամ եկամուտ։

«Հայաստան» դաշինքից Իշխան Սաղաթելյանը թանկարժեք գույքի բաժնում հայտարարագրել է 8 մլն դրամ արժողությամբ մատանի, սակայն շարժական գույքի (ավտոմեքենայի) բաժինը թողել է դատարկ։

Մանրամասները ՝ սկզբնաղբյուրում։