22 անշարժ գույք, միլիոնավոր դոլարներ ու ընկերություններ․ դատախազության պահանջը Ռոբերտ Քոչարյանի նկատմամբ

ՀՀ երկրորդ նախագահ Ռոբերտ Քոչարյանից ու նրա հետ փոխկապակցված անձանցից Գլխավոր դատախազությունը պահանջում է հօգուտ պետության բռնագանձել ծավալուն գույք, դրամական միջոցներ և մասնակցություններ։

Դատախազության պահանջը վերաբերում է 22 անշարժ գույքի, որոնցից 19-ի միջին շուկայական գումարային արժեքը գնահատվում է 11.154.790.000 դրամ, ինչպես նաև 2 անշարժ գույքի գնման իրավունքին։ Բացի այդ, պահանջվում է բռնագանձել 3.084.965 ԱՄՆ դոլարով ու 985.190.729 դրամով ձեռք բերված պարտատոմսեր, 1.405.059 դոլարը և 200 միլիոն դրամը գերազանցող ավանդներ։ Ցանկում ներառված են 13 իրավաբանական անձանցում մասնակցություններ (այդ թվում՝ «Տոյոտա Երևան» ՍՊԸ-ն, «Նաիրի Ինշուրանս» ապահովագրական ՍՊԸ-ն և այլն), ինչպես նաև 4 իրավաբանական անձի մասնակցության ձեռքբերման արժեքը։

Ներկայացված հայցադիմումով պահանջ է ներկայացվել նաև 4.025.914 դոլարի, 8.302.016.732 դրամի, 260.452.574 ռուբլու և 589.741 եվրոյի չափով փոխառությունների պահանջի իրավունքի վերաբերյալ։ Պահանջվում է բռնագանձել 2 տրանսպորտային միջոց, 3.822.451.103 դրամին համարժեք գումարով գույքի ձեռքբերման արժեքներ, 19.561.949.303 դրամի չափով ընդհանուր գումարային պահանջ, ինչպես նաև 502.359.121 դրամ՝ որպես քրեական գործով վճարված գրավի ապօրինի մաս։