Անհետ կորած զինծառայողների որոնումը երկար և բարդ գործընթաց կլինի. Մեդվեդև

Ռուսաստանի Անվտանգության խորհրդի փոխնախագահ Դմիտրի Մեդվեդևը հայտարարել է, որ Ուկրաինայի պատերազմում անհետ կորած զինծառայողների որոնումները երկար ժամանակ կպահանջեն։

Նա այս մասին ասել է «Գվարդեյսկ» համառուսաստանյան երիտասարդական ֆորումի մասնակիցների հետ հանդիպման ժամանակ։

«Ինչպես բոլորս հասկանում ենք, որոնման այս ուղղությամբ աշխատանքը բավական երկար կտևի։ Ցավոք, այդպես է լինում ցանկացած պատերազմի ժամանակ»,- նշել է Մեդվեդևը։

Նրա խոսքով՝ իր հանձնարարությամբ արդեն աշխատանքը սկսել է անհետ կորած զինծառայողների որոնմամբ զբաղվող միավորված որոնողական ջոկատը։ Մեդվեդևը այս գործունեությունն անվանել է նոր, շատ բարդ, բայց չափազանց պատասխանատու ուղղություն։

ՌԴ Անվտանգության խորհրդի փոխնախագահը նաև ընդգծել է, որ որոնողական աշխատանքները պետք է իրականացվեն անվտանգության բոլոր պահանջների պահպանմամբ և ռազմական ստորաբաժանումների հետ սերտ համագործակցությամբ։

Մեդվեդևի խոսքով՝ այդ հարցում արդեն ձեռք է բերվել պայմանավորվածություն Ռուսաստանի պաշտպանության նախարարության հետ, իսկ որոնողական աշխատանքներին պետք է ներգրավվեն նաև քննչական մարմինները։