Ռուսաստանը 131 անօդաչու է արձակել Ուկրաինայի ուղղությամբ

Ռուսական զորքերը հուլիսի 28-ի գիշերը Ուկրաինայի վրա իրականացրել են հարձակում՝ կիրառելով 131 հարվածային անօդաչու թռչող սարք։ Այդ մասին հայտնել են Ուկրաինայի զինված ուժերի ռազմաօդային ուժերը։

Ուկրաինական կողմի տվյալներով՝ ռուսական բանակը կիրառել է «Շահեդ», այդ թվում՝ ռեակտիվ տարբերակները, ինչպես նաև «Գերբերա», «Իտալմաս» և «Պարոդիա» տեսակի անօդաչուներ։ Դրանք արձակվել են Բրյանսկի, Կուրսկի, Օրյոլի մարզերից, ինչպես նաև օկուպացված Դոնեցկից և Ղրիմի Գվարդեյսկոյե բնակավայրից։

Նախնական տվյալներով՝ ժամը 08:00-ի դրությամբ հակաօդային պաշտպանությունը խոցել կամ ճնշել է 107 անօդաչու երկրի հյուսիսում, հարավում, կենտրոնում և արևելքում։

Ուկրաինայի ռազմաօդային ուժերի հրամանատարության տեղեկություններով՝ 16 հարվածային ԱԹՍ հասել է թիրախներին ինը տարբեր վայրերում, իսկ խոցված անօդաչուների բեկորները ընկել են ևս վեց վայրերում։

Ռուսական կողմը շարունակում է հերքել, որ պատերազմի ընթացքում դիտավորյալ հարվածներ է հասցնում քաղաքացիական ենթակառուցվածքներին։ Ուկրաինան և մի շարք միջազգային կազմակերպություններ, սակայն, այդ հարձակումները գնահատում են որպես ռազմական հանցագործություններ։