ԱՄՆ կոնգրեսականները պահանջում են. մահաբեր զենքի վերջնական որոշումը թող մնա մարդուն, ոչ թե ԱԲ-ին

ԱՄՆ Ներկայացուցիչների պալատի երկու կուսակցությունները ներկայացնող մի խումբ կոնգրեսականներ ներկայացրել են օրինագիծ, որը նախատեսում է ապահովել, որ ԱՄՆ զինված ուժերի կողմից մահաբեր ուժի կիրառման վերջնական որոշումը կայացնի մարդը, այլ ոչ թե արհեստական բանականությունը կամ ինքնավար համակարգերը։ Հայտնում է Axios-ը:

«Human Authority over Autonomous Weapons Act» («Ինքնավար զենքերի նկատմամբ մարդկային վերահսկողության մասին օրենք») անվանումը կրող նախաձեռնությունը ներկայացրել են դեմոկրատներ Դոն Բեյերը և Սառա Ջեյքոբսը, ինչպես նաև հանրապետական Թոմ Բարեթը։

Օրինագծով նախատեսվում է, որ Պաշտպանության նախարարությունը պետք է ապահովի, որպեսզի արհեստական բանականությամբ կամ ինքնավար համակարգերով կառավարվող ցանկացած մահաբեր զենքի կիրառումը կատարվի միայն մարդու վերահսկողությամբ, հաստատմամբ կամ անմիջական մասնակցությամբ («human-in-the-loop»)։

Բացի այդ, օրենքի ուժի մեջ մտնելուց հետո առաջին հինգ տարիների ընթացքում հրամանատարները պարտավոր կլինեն արհեստական բանականության կողմից ընտրված թիրախները ստուգել նաև ոչ ԱԲ աղբյուրների միջոցով։ Միաժամանակ, հակահրթիռային պաշտպանության համակարգերը բացառություն կկազմեն։

Թեև Պենտագոնն արդեն ունի քաղաքականություն, որը պահանջում է մարդու համապատասխան վերահսկողություն ուժի կիրառման հարցում, նոր նախաձեռնության նպատակն այդ պահանջները դաշնային օրենքի մակարդակով ամրագրելն է։

Օրինագծի հեղինակները նշել են, որ արհեստական բանականության արագ զարգացումը պահանջում է հստակ իրավական սահմաններ ռազմական ոլորտում։

«Ոչ մի մեքենա երբեք չպետք է ինքնուրույն որոշի սպանել մարդուն», — հայտարարել է կոնգրեսական Դոն Բեյերը։

Օրինագծի քննարկման ամենահավանական հարթակը կլինի ԱՄՆ պաշտպանության ոլորտի տարեկան պարտադիր քաղաքականության մասին օրինագիծը, որի շրջանակում ակնկալվում են նաև ռազմական ոլորտում արհեստական բանականության կիրառման սահմանափակումների շուրջ քննարկումներ։