Ադրբեջանում կանցկացվեն 6 երկրի մասնակցությամբ համատեղ զորավարժություններ

Ադրբեջանում անցկացվել է «Միասնության ուժ - 2026» համատեղ զորավարժությունների պլանավորման համաժողովը։

Համաժողովին մասնակցել են Ադրբեջանի, Թուրքիայի, Իրանի, Ղրղզստանի, Ուզբեկստանի և Պակիստանի պատվիրակությունները։

Մասնակիցներին ողջունելով՝ ադրբեջանցի գեներալ-լեյտենանտ Ազեր Ալիևը նշել է երկրների միջև ռազմական համագործակցության հաջող զարգացումը։

Զորավարժությունների հիմնական նպատակներն են՝ բանակների միջև համագործակցության ընդլայնումը, անձնակազմի գործնական հմտությունների կատարելագործումը, փորձի փոխանակումը, ինչպես նաև «կայուն խաղաղության և անվտանգության ամրապնդմանը նպաստելը»։

Մասնակիցներին ներկայացվել են զորավարժությունների սցենարը և մարտական դրվագները։ Պատվիրակությունները նաև ծանոթացել են դրանց անցկացման վայրին, հստակեցվել են առաջադրված խնդիրները։

Համաժողովի ավարտին մասնակից երկրները ստորագրել են արձանագրություն և կարծիքներ փոխանակել փոխադարձ հետաքրքրություն ներկայացնող հարցերի շուրջ: