Հունաստանը դեմ է Ռուսաստանի դեմ նոր պատժամիջոցներին՝ բիզնեսի շահերը պաշտպանելու համար

Հունաստանը դեմ է արտահայտվել Ռուսաստանի դեմ Եվրամիության 21-րդ պատժամիջոցների փաթեթին, քանի որ այն նախատեսում է արգելել ռուսական հեղուկացված բնական գազի (ՀԲԳ) փոխադրումը։ Այդ մասին, աղբյուրներին հղումով, հայտնում է Financial Times-ը։

Հուլիսի 15-ին ԵՄ անդամ երկրների դեսպաններին չի հաջողվել համաձայնեցնել նոր պատժամիջոցների փաթեթը, և բանակցությունները հետաձգվել են մինչև հուլիսի 23-ը։

Financial Times-ի տվյալներով՝ Հունաստանի ներկայացուցիչը հայտարարել է, որ ռուսական ՀԲԳ-ի փոխադրման արգելքը կարող է լուրջ հարված հասցնել հունական Dynagas նավատորմային ընկերությանը։

Equasis ծովային տեղեկատվական պորտալի տվյալներով՝ Dynagas-ը շահագործում է 27 գազատար նավ, որոնցից ինը Arc7 սառցադասի տանկերներ են։ Դրանք նախատեսված են Արկտիկայի բարդ պայմաններում աշխատելու համար և օգտագործվում են, մասնավորապես, «Յամալ ՀԲԳ» նախագծի սպասարկման նպատակով։

Հունաստանի դեսպանի խոսքով՝ եթե պատժամիջոցներն ընդունվեն ներկայիս տեսքով, Dynagas-ը չի կարողանա այդ նավերը շահագործել այլ տարածաշրջաններում և ստիպված կլինի վաճառել դրանք ոչ արևմտյան ընկերություններին։ Նման մասնագիտացված նավերից յուրաքանչյուրի արժեքը կարող է հասնել 300 միլիոն դոլարի։