Իրանը սպառնում է Իսրայելին՝ իր ենթակառուցվածքների վրա հարձակման դեպքում

Իրանը հայտարարել է, որ իր ենթակառուցվածքների վրա ցանկացած հարձակում անպատասխան չի մնա, և պատասխան հարվածներ կհասցվեն Իսրայելին։ Այդ մասին հայտարարել է Իրանի Ազգային անվտանգության բարձրագույն խորհրդի քարտուղար Մոհամմադ-Բաղեր Զոլղադրը, հաղորդում է IRNA-ն։

«Ենթակառուցվածքների վրա հարձակումները կարժանանան պատասխան հարվածի, և սիոնիստական ռեժիմը չի կարող խուսափել մեր մարտիկների պատասխանից»,– ասել է նա։

Ավելի վաղ Իրանի իշխանությունները նախազգուշացրել էին, որ ԱՄՆ-ի կողմից հարձակումների շարունակման դեպքում կընդլայնեն տարածաշրջանում ամերիկյան ռազմական օբյեկտների դեմ իրականացվող հարվածների աշխարհագրությունը։

Հուլիսի 8-ին ԱՄՆ զինված ուժերի Կենտրոնական հրամանատարությունը (CENTCOM) հայտարարել էր, որ սկսել է հարվածներ հասցնել Իրանի տարածքին՝ ի պատասխան Հորմուզի նեղուցում տեղի ունեցած նավթատար նավերի գնդակոծությունների։

Ի պատասխան՝ Իրանի զինված ուժերը հարվածներ են հասցրել Կատարի, Քուվեյթի, Բահրեյնի և Հորդանանի տարածքում գտնվող օբյեկտներին, սակայն Իսրայելի ուղղությամբ հարվածների մասին այդ ժամանակ տեղեկություններ չէին հաղորդվել։

The New York Times-ի տեղեկություններով՝ ներկայում Կատարը միջնորդական բանակցություններ է վարում Վաշինգտոնի և Թեհրանի միջև՝ նոր սրացում թույլ չտալու նպատակով։