NYT-ը հայտնել է Ռուսաստանի դեմ նոր պատժամիջոցներին աջակցելու Թրամփի պայմանը

The New York Times-ի տվյալներով՝ ԱՄՆ նախագահ Դոնալդ Թրամփը պատրաստ է աջակցել Ռուսաստանի դեմ նոր պատժամիջոցներ նախատեսող օրինագծին միայն այն պայմանով, որ սահմանափակումների կիրառման, դրանցից հրաժարվելու կամ գործողությունը կասեցնելու բացառիկ իրավունքը պատկանի անձամբ երկրի ղեկավարին։

Պարբերականը, հղում անելով իր աղբյուրին, նշում է, որ Թրամփը նման լիազորությունները կարևոր գործիք է համարում Ռուսաստանի հետ բանակցություններում։ Այս հարցը նախկինում արդեն տարաձայնությունների պատճառ էր դարձել Սպիտակ տան և դեմոկրատների միջև։

NYT-ը գրում է, որ մահվանից կարճ ժամանակ առաջ սենատոր Լինդսի Գրեհեմը կարծում էր, թե իրեն հաջողվել է համաձայնության հասնել Սպիտակ տան հետ։ Վարչակազմի ներկայացուցիչների հետ հանդիպումից հետո նա հայտարարել էր, որ կողմերը համաձայնեցրել են օրինագծի նոր տարբերակը, որին Թրամփը պատրաստ է աջակցել։

«Ուրախ եմ հայտնել, որ մոտ 30 րոպե առաջ Սպիտակ տան հետ համաձայնության ենք հասել Ռուսաստանի դեմ պատժամիջոցների մասին օրինագծի այն տարբերակի շուրջ, որին նրանք կաջակցեն։ Սա նշանակում է, որ այն օրենք կդառնա»,- իր վերջին հրապարակային ելույթի ժամանակ ասել էր Գրեհեմը։

Լինդսի Գրեհեմը մահացել է հուլիսի 11-ին՝ 71 տարեկան հասակում։ Նա ավելի քան 20 տարի Սենատում ներկայացրել է Հարավային Կարոլինա նահանգը և Ռուսաստանի նկատմամբ պատժամիջոցային ճնշման ուժեղացման ամենաակտիվ կողմնակիցներից էր։

2025 թվականի ապրիլին նա դեմոկրատ սենատոր Ռիչարդ Բլյումենթալի հետ միասին օրինագիծ էր ներկայացրել Մոսկվայի դեմ նոր սահմանափակումների վերաբերյալ։ 

Ավելի վաղ Թրամփը հայտարարել էր, որ Գրեհեմի հեղինակած պատժամիջոցային օրինագծի ընդունման «լավ հնարավորություն» կա։ Նա նաև նշել էր, որ նոր նախաձեռնության մեջ կարող են ընդգրկվել Իրանը և «Հեզբոլլահը»։

Միևնույն ժամանակ ԱՄՆ Սենատում չեն բացառում, որ Ռուսաստանի դեմ պատժամիջոցների վերաբերյալ հանգուցյալ Գրեհեմի օրինագիծը չի ստանա նախագահի լիարժեք աջակցությունը։

Ռուսաստանի իշխանությունները արևմտյան պատժամիջոցները համարում են անարդյունավետ և ոչ լեգիտիմ։