Ադրբեջանի արտաքին գործերի նախարարը կժամանի Մոսկվա․ ՌԴ ԱԳՆ

Ադրբեջանի ԱԳ նախարար Ջեյհուն Բայրամովը հուլիսի 16-ին աշխատանքային այցով կմեկնի Ռուսաստան, որտեղ բանակցություններ կանցկացնի Ռուսաստանի արտաքին գործերի նախարար Սերգեյ Լավրովի հետ։

ՌԴ ԱԳՆ պաշտոնական ներկայացուցիչ Մարիա Զախարովայի խոսքով՝ նախարարները կքննարկեն ռուս-ադրբեջանական հարաբերությունների ներկա վիճակն ու զարգացման հեռանկարները, ինչպես նաև տարածաշրջանային և միջազգային օրակարգի մի շարք արդիական հարցեր։

Հուլիսի 13-ին Ադրբեջանի նախագահ Իլհամ Ալիևը հայտարարել էր, որ Ռուսաստանի հետ հարաբերություններում առկա բարդ շրջանը մնացել է անցյալում, և իրավիճակը կարգավորվել է։ Երկկողմ լարվածությունը ծագել էր 2024 թվականի դեկտեմբերին AZAL ավիաընկերության ինքնաթիռի կործանումից հետո, ինչպես նաև 2025 թվականի ամռանը Եկատերինբուրգում էթնիկ հանցախմբի գործով Ադրբեջանի քաղաքացիների ձերբակալություններից և մահվան դեպքերից հետո։

Իսկ հուլիսի 14-ին Կրեմլի խոսնակ Դմիտրի Պեսկովը նշել էր, որ Մոսկվան սխալ է համարում Ադրբեջանի դիրքորոշումն Ուկրաինայի հարցում և մտադիր է այդ տեսակետը փոխանցել բոլոր հնարավոր ուղիներով։ Միաժամանակ նա ընդգծել էր, որ այդ հարցը չպետք է ազդի երկու երկրների երկկողմ հարաբերությունների վրա։