Լավրովը հայտարարել է, որ ԱՄՆ-ի կողմից Իրանի դեմ հարվածների վերսկսումը խախտում է հուշագիրը

Ռուսաստանը Միացյալ Նահանգների կողմից Իրանի դեմ հարվածների վերսկսումը դիտարկում է որպես Վաշինգտոնի և Թեհրանի միջև ստորագրված հուշագրի խախտում։ Այս մասին հայտարարել է ՌԴ արտգործնախարար Սերգեյ Լավրովը։

«Մենք ԱՄՆ-ի հարվածները դիտարկում ենք որպես հուշագրի խախտում։ Այստեղ նույնիսկ մեկնաբանելու շատ բան չկա։ Սա ցավալի է, քանի որ տուժում է ոչ միայն Իրանի, այլև Պարսից ծոցի արաբական պետությունների համագործակցության խորհրդի անդամ երկրների քաղաքացիական ենթակառուցվածքը։ Ամենակարևորը՝ այս քայլը չի նպաստում ճգնաժամի կարգավորմանը, այլ փակում է այն ճանապարհը, որը, թվում էր, բացել էր հիշյալ հուշագիրը», - լրագրողներին ասել է Լավրովը։

Թեհրանն ու Վաշինգտոնը հունիսի 18-ի գիշերը ստորագրել էին հուշագիր, որը նախատեսում էր փետրվարի 28-ից սկսված հակամարտության ավարտը։ Սակայն հուլիսի 8-ի գիշերը ԱՄՆ-ն վերսկսել էր հարվածները։

ԱՄՆ նախագահ Դոնալդ Թրամփը հայտարարել էր, որ այդ գործողությունները պատասխան են Իրանի՝ Հորմուզի նեղուցում առևտրային նավերի դեմ իրականացված գործողություններին։

Ի պատասխան՝ Իրանի զինված ուժերը հարվածներ էին հասցրել ԱՄՆ ռազմաբազաներին Քուվեյթում, Բահրեյնում և Հորդանանում։ Իրանի արտգործնախարարությունն էլ Վաշինգտոնի գործողությունները որակել էր որպես ձեռք բերված պայմանավորվածությունների կոպիտ խախտում։