ՏԵՍԱՆՅՈՒԹ.Վարդավառ 2026․ ինչպես են տոնում Երևանում

Երևանում վաղ առավոտից մեկնարկել է Վարդավառի տոնակատարությունը։ Հանրապետության հրապարակում, Կարապի լճի հարակից տարածքում և մայրաքաղաքի բազմաթիվ փողոցներում մարդիկ ջրային ատրճանակներով, դույլերով ու շշերով միմյանց են ջրում՝ պահպանելով տոնի ամենասիրված ավանդույթը։

Տոնական մթնոլորտը համախմբել է թե՛ երևանցիներին, թե՛ Հայաստանի հյուրերին։ Օտարերկրացիները ևս միացել են ջրոցուն՝ մասնակցելով երգ ու պարով, բարձր տրամադրությամբ ու փոխադարձ ջրելու ավանդույթին։

Հանրապետության հրապարակը կրկին դարձել է տոնի գլխավոր կենտրոններից մեկը, որտեղ ողջ օրվա ընթացքում մեծաթիվ մարդիկ մասնակցում են ջրային զվարճանքներին։

Վարդավառը Հայ Առաքելական եկեղեցու հինգ տաղավար տոներից մեկն է՝ նվիրված Հիսուս Քրիստոսի Պայծառակերպությանը, սակայն Հայաստանում այն պահպանել է նաև իր ժողովրդական ավանդույթները՝ վերածվելով տարվա ամենասիրված ու ամենաուրախ տոներից մեկի։ 2026 թվականին Վարդավառը նշվում է հուլիսի 12-ին։