ՌԴ ԱԴԾ-ի հայտարարությունը․ կանխվել է խոշոր ահաբեկչության փորձը

Ռուսաստանի Անվտանգության դաշնային ծառայությունը (ԱԴԾ) հայտարարել է «Ռոստով-Ցենտրալնի» ռազմական աերոդրոմի տարածքում ահաբեկչական գործողության նախապատրաստման փորձը կանխելու մասին: Ըստ գերատեսչության տարածած հաղորդագրության՝ գործողության հետևում կանգնած է Ուկրաինայի պաշտպանության նախարարության գլխավոր հետախուզական վարչությունը, որը նպատակ է ունեցել ոչնչացնել ավիացիոն տեխնիկան, վնասել ենթակառուցվածքները և թիրախավորել անձնակազմին:

Ռուսական կողմի պնդմամբ՝ ծրագրվող հարձակման մասին իրավապահներին հայտնել է հենց ենթադրյալ կատարողը, ով ՌԴ քաղաքացի է։ Վերջինս հայտարարել է, որ ուկրաինական կողմն իրեն դրամական պարգևատրում է խոստացել աերոդրոմում պայթյուն իրականացնելուց հետո: Ըստ հատուկ ծառայությունների տրամադրած տեղեկության՝ տվյալ անձն արդեն ստացել էր խոստացված ընդհանուր գումարի 20 տոկոսը որպես կանխավճար։

ԱԴԾ հաղորդմամբ՝ ռազմական օբյեկտին հարվածելու համար նախատեսվել է կիրառել արհեստական բանականության համակարգերով օժտված 13 FPV-անօդաչու թռչող սարք: Նշվում է նաև, որ յուրաքանչյուր դրոնի մարտական բեռնվածությունը կազմել է ավելի քան մեկ կիլոգրամ պայթուցիկ նյութ՝ տրոտիլային համարժեքով: