ՌԴ ՊՆ-ն հրատապ հայտարարություն է տարածել․ ուկրաինական կործանիչներ են ոչնչացվել

Ռուսաստանի պաշտպանության նախարարությունը հայտարարել է Նիկոլաևի մարզի «Վոզնեսենսկ» օդանավակայանում ուկրաինական երկու ՄիԳ-29 կործանիչների ոչնչացման մասին։ Ռազմական գերատեսչության տվյալներով՝ հարվածը հասցվել է այն պահին, երբ օդանավակայանում ընթանում էին թռիչքի նախապատրաստական աշխատանքներ։

Ինչպես նշվում է ՌԴ ՊՆ հաղորդագրության մեջ, ուկրաինական կործանիչներից մեկը՝ զինամթերքով բեռնված, գտնվել է երկաթբետոնե թաքստոցի առջևի կայանատեղիում։ Երկրորդ ինքնաթիռն այդ ընթացքում լիցքավորվում էր հենց թաքստոցի ներսում՝ հատուկ մեքենայի միջոցով։

Ռուսական կողմի պնդմամբ՝ օբյեկտի ուղղությամբ կիրառվել է «Գերան-4 սիքեր» տեսակի երկու անօդաչու թռչող սարք։ Հարվածի հետևանքով, բացի երկու ՄիԳ-29-ից, ոչնչացվել են նաև ավիացիոն խոցման միջոցների մարտակազմը, վառելիքալիցքավորող մեքենան և ԱՊԱ-5Դ աերոդրոմային շարժական ագրեգատը։

Նախարարությունը հավելել է, որ հարվածի գոտում եղել են նաև թռիչքային ու ինժեներատեխնիկական անձնակազմի ներկայացուցիչներ, որոնք ապահովում էին ինքնաթիռների մեկնումը։