Ընտրակաշառք տալու համար այսուհետ կարող է սպառնալ մինչև 10 տարվա ազատազրկում

Ազգային ժողովն արտահերթ նիստում ընդունել է Քրեական օրենսգրքում փոփոխություններ, որոնցով խստացվում է ընտրակաշառքի համար նախատեսված քրեական պատասխանատվությունը։ Նախաձեռնության հեղինակներն են ԱԺ նախագահ Ալեն Սիմոնյանը և «Քաղաքացիական պայմանագիր» խմբակցության մի շարք պատգամավորներ։

Ընդունված փոփոխություններով՝ ընտրակաշառք տալու համար նախատեսված ազատազրկման առավելագույն ժամկետը 6 տարուց բարձրացվել է մինչև 8 տարի, իսկ եթե հանցագործությունը կատարվել է նախնական համաձայնությամբ, առավելագույն պատիժը կկազմի մինչև 10 տարվա ազատազրկում։ Նույն պատիժը նախատեսվում է նաև ընտրակաշառքի փոխանցման միջնորդության համար։

Խստացվել է նաև ընտրակաշառք ստանալու համար պատասխանատվությունը։ Եթե նախկինում դրա համար նախատեսվում էր 1-3 տարվա ազատազրկում, ապա այժմ պատիժը կկազմի 2-5 տարի, իսկ նախնական համաձայնությամբ կատարված դեպքերում՝ մինչև 8 տարվա ազատազրկում։

Բացի այդ, ավելի խիստ պատիժ է սահմանվել նաև նախընտրական քարոզարշավի ընթացքում բարեգործության արգելքը խախտելու համար․ առավելագույն ազատազրկման ժամկետը 6 տարուց բարձրացվել է մինչև 8 տարի։

Նշենք, որ խորհրդարանական ընդդիմությունը նախագծի քվեարկությանը չի մասնակցել։