Փարիզում գնորդների միջև ծեծկռտուք է տեղի ունեցել օդորակիչների համար

Ֆրանսիայի մայրաքաղաք Փարիզի արվարձաններից մեկում գտնվող «Լիդլ» սուպերմարկետում գնորդների միջև ծեծկռտուք է տեղի ունեցել օդորակիչների և օդափոխիչների համար՝ երկրում սպասվող նոր շոգի ալիքի նախաշեմին։

«Լիդլ» առևտրային ցանցը Ֆրանսիայի շուրջ 1600 խանութներում վաճառքի էր հանել ընդհանուր առմամբ 200 հազար օդորակիչ և օդափոխիչ։ Սակայն Նանտեր համայնքում խանութի բացումից դեռ առաջ՝ առավոտյան ժամը 8-ին, այնտեղ հավաքվել էր ավելի քան հարյուր մարդ։

Ականատեսների հրապարակած տեսանյութերում երևում է, թե ինչպես է մեծ բազմությունը միաժամանակ ներխուժում խանութ՝ վնասելով ապակե մուտքի դռները։ Մեկ այլ տեսանյութում երկու կին փորձում են միմյանցից խլել նույն օդորակիչի տուփը։ Դեպքի վայր է ժամանել ոստիկանությունը՝ իրավիճակը վերահսկելու համար։

Ֆրանսիական լրատվամիջոցների տեղեկություններով՝ նմանատիպ մեծ հերթեր են գրանցվել նաև Փարիզի և մայրաքաղաքի արվարձանների մյուս «Լիդլ» խանութներում, իսկ որոշ գնորդներ հերթ էին կանգնել նույնիսկ գիշերվա ժամը մեկից։

Վերջին օրերին Ֆրանսիան, ինչպես նաև եվրոպական մի շարք այլ երկրներ, բախվել է անոմալ շոգի։ Երկրի օդերևութաբանական ծառայությունը 96 դեպարտամենտներից 72-ում հայտարարել էր եղանակային վտանգի ամենաբարձր մակարդակը։ Օդի ջերմաստիճանը մոտեցել է 40 աստիճանին, իսկ որոշ շրջաններում նույնիսկ գերազանցել այդ ցուցանիշը։