Հովիկ ու Ջոնիկ Աբրահամյանները միասին են դատվում․ «Հրապարակ»

«Հրապարակ»-ի տեղեկություններով՝ նախկին վարչապետ Հովիկ Աբրահամյանի՝ փողերի լվացման, պաշտոնեական լիազորությունները չարաշահելու եւ ձեռնարկատիրական գործունեությանն ապօրինի մասնակցելու գործին միացվել է նրա եղբոր՝ Հենրիկ (Ջոնիկ) Աբրահամյանի նկատմամբ վարույթը։ Հակակոռուպցիոն դատարանի դատավոր Արամ Գրիգորյանը որոշել է եղբայրների գործերը քննել մեկ վարույթով՝ իր նախագահությամբ։

Հենրիկ Աբրահամյանի գործով մեղադրյալի աթոռին են նա եւ որդին՝ Հովհաննեսը։ Վերջինս, ըստ մեղադրանքի, «Մեծն Հովնան» ՍՊԸ-ի տնօրեն եղած ժամանակ խախտել է շրջակա միջավայրի պահպանության եւ ընդերքի օգտագործման կանոնները՝ անզգուշությամբ առաջացնելով ծանր հետեւանքներ ու էական վնաս, ինչպես նաեւ օժանդակել է պաշտոնատար անձ Հովիկ Աբրահամյանին՝ ապօրինի մասնակցել ձեռնարկատիրական գործունեությանը։