ՏԵՍԱՆՅՈՒԹ.Կան դեպքեր, երբ կեղծ փաստաթղթերով ազատվում են զինվորական ծառայությունից. Ալեքսանյան

Վահագն Ալեքսանյանի փոխանցմամբ՝ ներկայումս իրավապահ համակարգը չունի որևէ գործիքակազմ՝ կեղծ փաստաթղթերով զինծառայությունից ազատված և փորձաքննությունից հրաժարվող քաղաքացիներին հետազոտության հարկադրելու համար:

Ըստ պատգամավորի՝ լինում են դեպքեր, երբ իրավապահ մարմինները ստանում են օպերատիվ տեղեկատվություն այն մասին, որ այս կամ այն անձը կեղծ թղթերով ազատվել է զինվորական ծառայությունից։ Նման դեպքերում հարուցվում է վարույթ, և քաղաքացուն առաջարկվում է անցնել փորձաքննություն՝ ստուգելու համար տեղեկանքում նշված հիվանդության առկայությունը, սակայն վարույթով անցնող քաղաքացին հրաժարվում է հետազոտությունից։ 

Ալեքսանյանը նշել է, որ սա անբնական ու աննորմալ իրավիճակ է, և ներկայացված օրենքի նախագիծը միտված է հենց դրա հաղթահարմանը։ Պատգամավորը հավելել է, որ կառավարությունն այս առնչությամբ ունի առաջարկներ, որոնք իր համար ընդունելի են, և առաջարկել է, որ դրանք ներկայացնի գործադիրի ներկայացուցիչը։ Քննարկման ընթացքում նաև հավելվել է, որ քաղաքացիները ոչ միայն հրաժարվում են կրկնակի ուսումնասիրություններից, այլև պարզվում է, որ նախկինում ուսումնասիրված նյութերի արդյունքները չեն պահպանվում: