Երևանում 16-ամյա տղաները ծեծել և կողոպտել են Ռուսաստանի քաղաքացուն

Հունիսի 28-ին, ժամը 03։20–03։30-ի սահմաններում, Երևանում՝ Կարապի լճի և Հյուսիսային պողոտայի հատվածում, արձանագրվել է ծեծկռտուք և կողոպուտի դեպք, այս մասին հայտնում է ֆոտոլրագրող Գագիկ Շամշյանը:

Դեպքի վերաբերյալ տեղեկությունը ստացվել է ՀՀ Ներքին գործերի նախարարության ոստիկանության քրեական ոստիկանության գլխավոր վարչության Երևան քաղաքի վարչությունում։ Օպերատիվ խումբը մեկնել է դեպքի վայր, որտեղ տուժողը՝ Ռուսաստանի Դաշնության 39-ամյա քաղաքացի Մարկ Սլավիչը, հայտնել է, որ ենթարկվել է հարձակման։

Նրա խոսքով՝ գիշերային ժամերին Կարապի լճի մոտ իրեն մոտեցել են երեք երիտասարդներ, որոնք հարձակվել են նրա վրա, հարվածներ հասցրել, գցել գետնին և բռնելով ձեռքերը՝ տաբատի ձախ գրպանից հափշտակել են 63 հազար դրամ գումար։ Այնուհետև հարձակվողները դիմել են փախուստի։

Քրեական ոստիկանության իրականացրած օպերատիվ-հետախուզական միջոցառումների արդյունքում պարզվել է, որ ենթադրյալ հանցագործությանը մասնակցել են Երևանի բնակիչ 16-ամյա Մ․ Մ․-ն և Արմավիրի մարզի բնակիչ 16-ամյա Ն․ Ս․-ն։ Մյուս անձի ինքնությունը դեռևս պարզվում է, և ոստիկանությունը շարունակում է որոնողական աշխատանքները։

Դեպքի փաստով կազմվել են համապատասխան նյութեր, որոնք փոխանցվել են ՀՀ Քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժին՝ հետագա ընթացքը ապահովելու համար։

Իրավապահ մարմինները նաև ձեռնարկում են միջոցառումներ՝ գողացված գումարի և դեպքի մյուս մասնակիցի հայտնաբերման ուղղությամբ։