Քոչարյանի գրասենյակից արձագանքել են Իսրայելի` Հայոց ցեղասպանության հետ կապված հայտարարությանը

Իսրայելի կառավարությունը հունիսի 28-ին միաձայն հավանություն է տվել Հայոց ցեղասպանությունը պաշտոնապես ճանաչելու նախագծին։

Այս մասին հայտնել է նախագծի հեղինակ, արտաքին գործերի նախարար Գիդեոն Սաարը՝ նշելով. «Այս սարսափելի ցեղասպանությունը, որը տեղի է ունեցել ավելի քան 100 տարի առաջ և որի պատմական փաստերն իսկապես անվիճելի են, ներառել է մեկուկես միլիոն մարդու սպանություն և հին մշակութային ու պատմական ժառանգության ոչնչացում»։

Yerevan.Today-ը դիմել է ՀՀ երկրորդ նախագահ Ռոբերտ Քոչարյանի գրասենյակի ղեկավար Բագրատ Միկոյանին՝ պարզելու նախագահ Քոչարյանի դիրքորոշումը Իսրայելի կողմից ճանաչման վերաբերյալ՝ հաշվի առնելով նաև Ցեղասպանությունը ճանաչելու ժամանակը և Իսրայելի կողմից այս խնդիրը որպես Թուրքիայի դեմ զենք կիրառելը։

Բագրատ Միկոյանը պատասխանել է. «Որևէ պետության կողմից Հայոց ցեղասպանության ճանաչումը և դատապարտումը համամարդկային առումով ճշմարտության և արդարության հաստատման կարևոր քայլ է։ Մենք շնորհակալ ենք այդ քայլը կատարած բոլոր պետություններին։ Հայ ժողովրդի, պետության և արդարության շահերից է բխում ճանաչման փաստը։ Իսկ ճանաչող պետությունն ինքնին կարող է ունենալ իր դրդապատճառները և շահերը, ինչը նույնպես բնական է։ Նման հարցերին պետք է նայել շատ սթափ»։