Մարդու իրավունքների համակարգը չի կարող արդյունավետ գործել խտրականության և անհանդուրժողականության պայմաններում. ՄԻՊ

Ըստ բաց տվյալների՝ ՄԻՊ-ը մասնակցել է ԼԳԲՏ համայնքի իրավունքներին նվիրված միջոցառմանը և հանդես եկել ելույթով:

ՀՀ մարդու իրավունքների պաշտպան Անահիտ Մանասյանը հայտարարել է, որ մարդու իրավունքների պաշտպանության արդյունավետ համակարգը չի կարող լիարժեք գործել անհանդուրժողականության, խտրականության և նախապաշարմունքների պայմաններում։

Նա այս մասին խոսել է «Հպարտության ամիս 2026. տեսանելիություն, իրավունքներ և առաջընթաց» թեմայով պանելային քննարկման ընթացքում, որը կազմակերպվել է «Իրավունքի կողմ» իրավապաշտպան ՀԿ-ի նախաձեռնությամբ։

ՄԻՊ-ը ընդգծել է, որ ժողովրդավարական հասարակությունում յուրաքանչյուր անձ պետք է ունենա հավասար իրավունքների և արժանապատվության պաշտպանության երաշխիքներ՝ անկախ որևէ հանգամանքից։

Նրա խոսքով՝ անհրաժեշտ է հաղթահարել հասարակության մեջ ձևավորված կարծրատիպերը և բացառել խտրականությունն ու ատելության խոսքը, քանի որ դրանք նպաստում են անհանդուրժողականության տարածմանը, այդ թվում նաև պետական համակարգում։

Անահիտ Մանասյանը նաև կարևորել է իրավահավասարության և հակախտրականության ոլորտում համապարփակ օրենսդրության ընդունումը, ինչպես նաև իրավապահ և այլ ոլորտների մասնագետների շարունակական վերապատրաստումները՝ խտրական դրսևորումները ճիշտ գնահատելու համար։

Նա ընդգծել է նաև քաղաքացիական հասարակության և միջազգային գործընկերների հետ համագործակցության կարևորությունը՝ մարդու իրավունքների պաշտպանության համակարգի ամրապնդման նպատակով։