«Ազատություն TV»-ի հեղինակազորման վկայագիրը դադարեցվել է ՀՌՀ-ի որոշմամբ

Հեռուստատեսության և ռադիոյի հանձնաժողովը հունիսի 30-ի նիստում մի շարք որոշումներ է ընդունել՝ կապված հեռարձակման ոլորտի լիցենզիաների, մրցույթների և վարչական պատասխանատվության հետ։

Հանձնաժողովը բավարարել է «ԱԶԱՏՈՒԹՅՈՒՆ ԹԻՎԻ» ՍՊԸ-ի դիմումը և որոշել 2026 թվականի հուլիսի 1-ից ուժը կորցրած ճանաչել ընկերությանը 2021 թվականի փետրվարի 3-ին տրամադրված հեղինակազորման վկայագիրը։

Նույն նիստում ՀՌՀ-ն հայտարարել է հանրային մուլտիպլեքսում սլոթի օգտագործման լիցենզավորման նոր մրցույթներ՝ ինչպես մայրաքաղաքային, այնպես էլ Արմավիրի մարզի տարածքում հեռարձակման համար։

Բացի այդ՝ Տավուշի մարզում լսողական ծրագրի հաճախականության մրցույթին մասնակցելու հայտ է ներկայացրել միայն «ԷՖ-ԷՄ» ՍՊԸ-ն։

Նիստի ընթացքում վարչական վարույթի արդյունքում տուգանվել է նաև «ՀՈՒՍԱԲԵՐ» ՓԲԸ-ն՝ «ԵՐԿԻՐ ՄԵԴԻԱ» ծրագրով արձանագրված խախտման համար։ Ըստ ՀՌՀ-ի՝ ֆիլմի հեռարձակման ընթացքում չեն պահպանվել ծխելու վերաբերյալ պարտադիր նախազգուշական պահանջները, ինչի համար ընկերությունը տուգանվել է 100,000 դրամով։