Եվրախորհրդարանն ու ԵԽԽՎ-ն թիրախավորում են Ադրբեջանը. Ալիև

ԵՔՀ գագաթնաժողովի լիագումար նիստում Իլհամ Ալիևը հայտարարել է, որ Եվրոպական խորհրդարանն ու ԵԽԽՎ-ն թիրախավորում են Ադրբեջանը՝ տարածելով սուտ և զրպարտանք։


ԵՔՀ գագաթնաժողովի ընթացքում Իլհամ Ալիևը երախտագիտություն է հայտնել Եվրահանձնաժողովին Հայաստան-Ադրբեջան խաղաղության գործընթացում ունեցած դիրքորոշման համար, սակայն քննադատել է Եվրախորհրդարանին և ԵԽԽՎ-ին։ Նա հիշեցրել է, որ Ադրբեջանը Եվրոխորհրդի անդամ է 2001 թվականից, և իրենց պատվիրակությունը մինչև 2024-ի հունվարը որևէ սահմանափակման չի ենթարկվել։


Անդրադառնալով Եվրախորհրդարանին՝ Ալիևը նշել է, որ 2021-ի մայիսից մինչև 2026-ի ապրիլի 30-ը կառույցն ընդունել է Ադրբեջանի մասին ստահոդ և վիրավորական 14 բանաձև։ Նա շեշտել է, որ վերջին բանաձևն ընդունվել է գագաթնաժողովից ընդամենը չորս օր առաջ։ Ըստ նրա՝ Եվրախորհրդարանը սեփական խնդիրներին անդրադառնալու փոխարեն զրպարտում է Ադրբեջանին տարածքային ամբողջականության պաշտպանության և պատերազմական հանցագործներին արդարության առջև կանգնեցնելու համար։


Ադրբեջանի նախագահը տեղեկացրել է, որ մայիսի 1-ին երկրի խորհրդարանը պաշտոնապես որոշել է կասեցնել համագործակցությունը Եվրախորհրդարանի հետ բոլոր ոլորտներում, դադարեցնել մասնակցությունը ԵՄ-Ադրբեջան խորհրդարանական փոխգործակցության կոմիտեում և նախաձեռնել «Եվրանեսթ» վեհաժողովից դուրս գալու ընթացակարգ։ «Ես պարզապես որոշել էի գործընկերներիս իրազեկել այս ուղղությամբ տեղի ունեցողի մասին, որպեսզի ապատեղեկատվություն և մանիպուլյացիաներ չլինեն»,- եզրափակել է նա։