«Ռոսկոմնադզորի» պահանջները՝ անպատասխան․ Մոսկվայի հայտարարությունը Telegram-ի մասին

Ռուսաստանի թվային զարգացման նախարար Մակսուտ Շադաևը հայտարարել է, որ Telegram մեսենջերը, ռուսական կողմի պնդմամբ, համագործակցում է օտարերկրյա հատուկ ծառայությունների հետ։ Նրա խոսքով՝ ռուսական իրավասու մարմիններն ունեն տվյալներ, ըստ որոնց՝ հարթակը հասանելիություն է տրամադրում օգտատերերի հաղորդագրություններին։

Շադաևը նշել է, որ, իր պնդմամբ, այդ տեղեկատվությունն օգտագործվում է Ուկրաինայում ռուսական բանակի դեմ գործողություններում։ Միևնույն ժամանակ նա հայտարարել է, որ Telegram-ը չի արձագանքել «Ռոսկոմնադզորի» կողմից ուղարկված շուրջ 150 հազար պահանջներին՝ արգելված տեղեկատվությունը հեռացնելու վերաբերյալ։

Նախարարի խոսքով՝ ներկայումս Telegram-ում դանդաղեցված է մեդիաֆայլերի փոխանցումը, մինչդեռ տեքստային հաղորդագրությունների հասանելիությունը պահպանվում է։

Telegram-ի կողմից այս հայտարարությունների վերաբերյալ պաշտոնական արձագանք չի հրապարակվել։