Ուկրաինացիները վարժանքի ժամանակ «ոչնչացրել» են ՆԱՏՕ-ի երկու գումարտակ

Էստոնիայում անցկացված Hedgehog 2025 զորավարժությունների ընթացքում ուկրաինացի անօդաչու սարքերի օպերատորները պայմանական սցենարով «ոչնչացրել» են ՆԱՏՕ-ի երկու գումարտակ։ Այս մասին գրում է The Wall Street Journal-ը։

Վարժանքներին մասնակցել են ավելի քան 16 հազար զինվորականներ դաշինքի 12 երկրներից։ Նրանց հակադրվել են ուկրաինացի մասնագետներ, այդ թվում՝ մարտական փորձ ունեցող զինծառայողներ։ Սցենարի համաձայն՝ հակառակորդի մի խումբը կազմել է շուրջ 100 մարդ, իսկ մյուսը՝ 10 ուկրաինացի։

Փոքրաթիվ թիմը կես օրվա ընթացքում պայմանականորեն շարքից դուրս է բերել 17 զրահամեքենա և իրականացրել ևս 30 հարված տարբեր թիրախների ուղղությամբ։ Էստոնիայի պաշտպանության ուժերի ներկայացուցչի խոսքով՝ ՆԱՏՕ-ի ստորաբաժանումները գործել են առանց պատշաճ քողարկման և տեխնիկան տեղակայել բաց տարածքում։

Արդյունքում սցենարով երկու գումարտակ ճանաչվել է «ոչնչացված» և չի շարունակել պայմանական մարտը։ Նշվում է, որ անօդաչու սարքերի լայն կիրառումը փոխում է մարտավարական մոտեցումները, ինչին արևմտյան բանակները դեռևս լիարժեք հարմարված չեն։