Զելենսկին հերքել է ընտրությունների մասին լուրը

Ուկրաինայի նախագահ Վլադիմիր Զելենսկին հայտարարել է, որ փետրվարի 24-ին ընտրություններ անցկացնելու մասին տեղեկությունները չեն համապատասխանում իրականությանը։ Նա բրիֆինգի ընթացքում նաև բացառել է Մոսկվա բանակցային պատվիրակություն ուղարկելու տարբերակը։

Զելենսկու խոսքով՝ Ուկրաինայում ընտրություններ կարող են կազմակերպվել միայն անվտանգության հստակ երաշխիքներ և հրադադար ապահովվելու դեպքում։ Նա ընդգծել է, որ ԱՄՆ-ն չի սպառնում Կիևին անվտանգության երաշխիքներից զրկել, եթե ընտրություններ չանցկացվեն։

Նախագահը նաև հայտնել է, որ պատրաստ է բանակցությունների նպատակով հանդիպել ԱՄՆ-ի, Եվրոպայի կամ որևէ չեզոք երկրի տարածքում, սակայն ոչ Ռուսաստանի և ոչ էլ Բելառուսի։

Ավելի վաղ Times of Ukraine-ը, հղում անելով իր աղբյուրներին, գրել էր, թե Կիևը քննարկում է Մոսկվա պատվիրակություն ուղարկելու հնարավորությունը։ Financial Times-ն էլ տեղեկացրել էր, որ ուկրաինական իշխանությունները համաձայնել են ԱՄՆ-ի առաջարկին՝ մինչև մայիսի 15-ը անցկացնել նախագահական ընտրություններ և հանրաքվե Ռուսաստանի հետ հնարավոր խաղաղ համաձայնագրի վերաբերյալ։