Չեղարկվել է պատերազմի մասնակից Էրիկ Գասպարյանի մոր՝ 15 հազար դրամ տուգանքի արձանագրությունը

Երևանի քաղաքապետարանը չեղյալ է համարել 44-օրյա պատերազմի մասնակից, պատերազմի հետևանքով առաջին կարգի հաշմանդամություն ձեռք բերած սպա Էրիկ Գասպարյանի մորը՝ Լուսինե Գասպարյանին վարչական պատասխանատվության ենթարկելու վերաբերյալ արձանագրությունը։ Այս մասին հայտնել է փաստաբան Լուսինե Մարտիրոսյանը։ 

Օրեր առաջ հայտնի էր դարձել, որ Էրիկ Գասպարյանի մոր նկատմամբ Երևանի հասարակական տրանսպորտից օգտվելու դիմաց իբրև չվճարելու համար կազմվել է 15 հազար դրամ տուգանքի արձանագրություն։ Ըստ հրապարակված տեղեկությունների՝ նրան ավելի վաղ քաղաքապետարանի և վարչական շրջանի կողմից տրամադրվել էր անվճար երթևեկության քարտ, որպեսզի կարողանա այցելել «Զինվորի տուն», որտեղ բուժում է ստանում որդին։ 

Դեպքը լայն արձագանք էր ստացել սոցիալական ցանցերում, հնչել էին կոչեր՝ վերացնելու վարչական ակտը։ Ավելի ուշ փաստաբան Լուսինե Մարտիրոսյանը հայտնել է, որ քաղաքապետարանից իրեն տեղեկացրել են՝ վարչական պատասխանատվության ենթարկելու մասին արձանագրությունը չեղյալ է համարվել։ 

Երևանի քաղաքապետի խոսնակ Արտյոմ Կարապետյանն ավելի ուշ պարզաբանել է, որ գործող կարգավորմամբ հաշմանդամություն ունեցող անձի անվճար երթևեկության արտոնությունը տրամադրվում է հենց շահառուին և չի տարածվում նրան ուղեկցող անձի կամ ընտանիքի անդամի վրա։ Քաղաքապետարանից նաև հայտնել են, որ քննարկվում է նախագիծ, որով որոշ դեպքերում հաշմանդամություն ունեցող անձանց օգնականների, ուղեկցողների կամ ընտանիքի անդամների համար ևս կարող է նախատեսվել արտոնյալ կամ անվճար երթևեկություն։