Ֆոն դեր Լայենը զգուշացրել է Չինաստանից ԵՄ-ի վտանգավոր կախվածության մասին

Եվրամիությունը պետք է ձգտի Չինաստանի հետ արդար տնտեսական հարաբերությունների, քանի որ Պեկինից կախվածությունը կարող է օգտագործվել ԵՄ-ի վրա ճնշում գործադրելու համար։ Այս մասին հայտարարել է Եվրահանձնաժողովի նախագահ Ուրսուլա ֆոն դեր Լայենը։

Նրա խոսքով՝ որոշ չինական ընկերություններ ստանում են սուբսիդիաներ, որոնք մինչև ութ անգամ գերազանցում են Տնտեսական համագործակցության և զարգացման կազմակերպության երկրներում համադրելի ընկերություններին տրամադրվող աջակցությունը։

«Հինգ տարվա ընթացքում Չինաստանից ԵՄ ներմուծումն աճել է 45%-ով, մինչդեռ մեր արտահանումը Չինաստան նվազում է։ Չինաստանի հետ մեր առևտրային պակասուրդն այժմ հասել է օրական գրեթե 1 միլիարդ եվրոյի»,– ասել է ֆոն դեր Լայենը։

Եվրահանձնաժողովի նախագահի խոսքով՝ Չինաստանը շարունակում է մնալ ԵՄ-ի առանցքային տնտեսական գործընկերը, և Բրյուսելը վարում է «ռիսկերի նվազեցման՝ առանց կապերի խզման» քաղաքականություն։ Միևնույն ժամանակ ԵՄ-ն չի կարող հաշտվել շարունակական տնտեսական անհավասարակշռության հետ։

Ֆոն դեր Լայենը նշել է, որ եվրոպական արդյունաբերական արտադրության ավելի քան կեսն արդեն մրցակցության է բախվում Չինաստանի կողմից։ Բացի այդ, Չինաստանը վերահսկում է մատակարարման շղթաների առանցքային օղակները։

«Կրիտիկական նշանակության հումքի բազմաթիվ տեսակների դեպքում Չինաստանից մեր կախվածությունը գերազանցում է 80%-ը, իսկ որոշ հազվագյուտ մետաղների դեպքում՝ 90%-ը։ Մենք համոզվել ենք, որ այդ կախվածությունը կարող է օգտագործվել որպես մեզ վրա ճնշման լծակ»,– ընդգծել է նա։

Ֆոն դեր Լայենի խոսքով՝ Չինաստանի հետ երկխոսությունն անհրաժեշտ է, սակայն այն պետք է արդյունքներ տա։ Եթե բանակցությունները բավարար չլինեն, ԵՄ-ն պետք է ամբողջությամբ օգտագործի իր տրամադրության տակ եղած պաշտպանական գործիքները։

Նա նաև հայտնել է, որ միայն վերջին մեկ տարվա ընթացքում ԵՄ-ն առևտրային պաշտպանության ոլորտում ավելի քան 30 նոր հետաքննություն է սկսել։ Եվրահանձնաժողովի գնահատմամբ՝ ձեռնարկված միջոցներն արդեն պաշտպանում են ավելի քան 600 հազար եվրոպական աշխատատեղ։

«Մեր շուկան մնում է բաց, բայց բաց լինելը պահանջում է անվտանգություն, արդարություն և փոխադարձություն»,– եզրափակել է Եվրահանձնաժողովի նախագահը։