Զելենսկին հրամանագիր է ստորագրել. 60 տարեկանից բարձր տղամարդիկ կանցնեն զինծառայության
Ուկրաինայի նախագահ Վլադիմիր Զելենսկին ստորագրել է հրամանագիր, որով 60 տարեկանից բարձր քաղաքացիներին թույլատրվում է ռազմական դրության պայմաններում պայմանագրային հիմունքներով ծառայել Զինված ուժերում։ Փաստաթղթով սահմանվում է, որ կամավորները պետք է առողջական վիճակի վերաբերյալ դրական եզրակացություն ստանան ռազմաբժշկական հանձնաժողովից։
Բացի այդ, ծառայության ընդունվելու համար անհրաժեշտ է այն զորամասի հրամանատարի գրավոր համաձայնությունը, որտեղ նախատեսվում է ծառայությունը։ Եթե խոսքը սպայական պաշտոնի մասին է, պահանջվում է նաև Գլխավոր շտաբի հաստատումը։ Դիմումները ներկայացվում են բնակության վայրի տարածքային համալրման և սոցիալական աջակցության կենտրոնների միջոցով։
Պայմանագիրը կնքվում է մեկ տարի ժամկետով և կարող է երկարաձգվել նույն ժամկետով։ Այն կարող է վաղաժամկետ դադարեցվել ռազմական դրության չեղարկման կամ ավարտի դեպքում։ Ծառայության անցնելուց հետո 60-ից բարձր անձանց համար սահմանվում է երկամսյա փորձաշրջան, որի ընթացքում անհամապատասխանության դեպքում պայմանագիրը լուծվում է։
Նշվում է նաև, որ 2025 թվականի փետրվարից Ուկրաինայում գործում է 18-24 տարեկանների կամավոր պայմանագրային ծառայության ծրագիրը՝ նախատեսելով բարձր վճարումներ և սոցիալական արտոնություններ։ Ռազմական դրությունն ու համընդհանուր զորահավաքը երկրում գործում են 2022 թվականից և պարբերաբար երկարաձգվում են։
