Եվրախորհրդարանը կոչը՝ Ադրբեջանին. ազատ արձակեք հայ կալանավորներին
Եվրախորհրդարանի պատգամավորները հանդես են եկել համատեղ հայտարարությամբ՝ անդրադառնալով Ադրբեջանում պահվող հայերին։ Նրանք դատապարտել են Բաքվի ռազմական դատարանի կայացրած վճիռները 19 հայ պահվող անձանցից 15-ի նկատմամբ։
Փաստաթղթում նշվում է, որ 2025 թվականին Ադրբեջանի և Հայաստանի միջև խաղաղության և հաշտեցման ուղղությամբ նշանակալի քայլեր են կատարվել․ ստորագրվել է Վաշինգտոնյան հռչակագիրը, նախաստորագրվել է խաղաղության համաձայնագրի տեքստը, ինչպես նաև տասնամյակների ընթացքում առաջին անգամ Ադրբեջանի տարածքով բեռներ են ուղարկվել Հայաստան։ Պատգամավորները հիշեցրել են նաև, որ Բաքուն ազատ է արձակել Ադրբեջանում պահվող 4 հայի։
«Հաշվի առնելով այս զարգացումները՝ կոչ ենք անում Ադրբեջանի իշխանություններին շարունակել դրական դինամիկան և ազատ արձակել բոլոր հայ կալանավորված անձանց»,- նշված է հայտարարության մեջ։
Պատգամավորները համոզմունք են հայտնել, որ նրանց ազատ արձակումը կլինի բարի կամքի կարևոր դրսևորում և ևս մեկ նշանակալի քայլ Հարավային Կովկասում երկարատև խաղաղության հաստատման ուղղությամբ։
