6 անձ ձերբակալված է․ ՔԿ-ն՝ Վաղարշապատի դեպքերի մասին

«Հաղթանակ» դաշինքի անդամ և աջակից 7 անձի նկատմամբ հանրային քրեական հետապնդում է հարուցվել ընտրական իրավունքին խոչընդոտելու համար։ Այս մասին Auroranews.am-ին հայտնում են ՀՀ քննչական կոմիտեի մամուլի ծառայությունից։

«6 անձ ձերբակալվել է՝ կալանքը որպես խափանման միջոց կիրառելու նպատակով դատարան ներկայացնելու համար»,- հայտնում են գերատեսչությունից:

Ավելի վաղ Վաղարշապատի ավագանու «Հաղթանակ» խմբակցության ղեկավար Սևակ Խաչատրյանը գրառում էր արել «Ֆեյսբուք» սոցիալական ցանցում` նշելով, որ բռնաճնշումներ են սկսվել ընդդիմադիր հայացքներ ունեցող տարբեր անձանց նկատմամբ: Նա գրել էր, որ 5 անձ է ձերբակալվել, խուզարկություններ են իրականացվում։ Ավելի ուշ մամուլի ասուլիսի ժամանակ հայտնել էր, որ արդեն ավելի քան 10 անձ է ձերբակալվել։

Քննչական կոմիտենն էլ ավելի վաղ հայտնել էր, որ փաստական տվյալներ էին ձեռքբերվել, ըստ որի՝ 2025թ․ նոյեմբերի 16-ին Վաղարշապատում ՏԻՄ ընտրությունների ընթացքում «Հաղթանակ» դաշինքի ավագանու ցուցակում ընդգրկված Ս.Դ.-ն, Ն.Օ.-ն և նույն դաշինքի աջակիցներ Ա.Ա.-ն և Մ.Մ.-ն մի շարք անձանց ուղղորդել են քվեարկել դաշինքի օգտին` այդ կերպ խոչընդոտելով անձնական ընտրական իրավունքի ազատ իրականացմանը:

Վարույթ է նախաձեռնվել Քրեական օրենսգրքի 210-րդ հոդվածի 2-րդ մասի 6-րդ կետով:

ՔԿ-ից նաև հայտնում են, որ ձերբակալված անձանց տներում և կից օժանդակ շինություններում խուզարկություններ են կատարվել, որոնց արդյունքում հայտնաբերվել են քրեական վարույթի համար նշանակություն ունեցող փաստաթղթեր: