Էլեկտրաշոկով հարվածել է համագյուղացուն, պարանով կապել ձեռքերը. մանրամասներ
Դեկտեմբերի 11-ին Համայնքային ոստիկանության Գուգարքի բաժնում ավազակության վերաբերյալ օպերատիվ տեղեկություն էր ստացվել: Այս մասին տեղեկանում ենք ՆԳՆ ոստիկանության տարածած հաղորդագրությունից:
Ձեռնարկված օպերատիվ-հետախուզական միջոցառումների արդյունքում պարզվել է, որ Դարպաս գյուղի 46-ամյա բնակիչը, որպես արհեստավոր գնալով 35-ամյա համագյուղացու տուն, էլեկտրաշոկով հարվածներ է հասցրել նրան, ապա պարանով կապել ձեռքերը՝ պահանջելով, որ նա հաշվեհամարին եղած գումարը փոխանցի իր հաշվին: Բռնության ենթարկված 35-ամյա երիտասարդը 10000 դոլար փոխանցել է 46-ամյա համագյուղացու հաշվեհամարին:
Դարպաս գյուղի 35-ամյա բնակչից հաղորդում է ընդունվել:
46-ամյա տղամարդը ձերբակալվել, տեղափոխվել է Գուգարքի բաժին, ապա կազմված փաստաթղթերի հետ ներկայացվել է Լոռու մարզի քննչական վարչություն։
