Մեծ Բրիտանիան Իրանից դուրս է բերել իր դիվանագիտական ծառայողներին

 Մեծ Բրիտանիան անվտանգության նկատառումներից ելնելով ժամանակավորապես դուրս է բերել Իրանում գտնվող իր դեսպանատան դիվանագիտական անձնակազմին՝ ԱՄՆ նախագահ Դոնալդ Թրամփի կոշտ հայտարարություններից հետո և տարածաշրջանում հնարավոր էսկալացիայի ֆոնին։

Մեծ Բրիտանիայի կառավարության հայտարարության համաձայն՝ որոշումը կրում է կանխարգելիչ բնույթ։ Լոնդոնը նաև զգուշացրել է, որ Իրանում բրիտանացիներին տեղում հյուպատոսական օգնություն տրամադրելու հնարավորությունները խիստ սահմանափակ են, իսկ դեսպանատունը շարունակում է գործել հեռավար ձևաչափով։

Թրամփը Truth Social սոցիալական ցանցում հայտարարել էր, որ եթե Իրանը Հորմուզի նեղուցում որևէ նավի վրա հարձակվի հրթիռներով, անօդաչու թռչող սարքերով կամ այլ միջոցներով, ԱՄՆ-ն կկործանի Իրանի մեկ կամուրջ կամ էլեկտրակայան, այդ թվում՝ Թեհրանի հարևանությամբ գտնվող ենթակառուցվածքներ։

Այս հայտարարությունից հետո Իրանի պաշտոնյաները մի շարք կոշտ պատասխան հայտարարություններ են արել, իսկ իսրայելական լրատվամիջոցների փոխանցմամբ՝ Իսրայելը պատրաստվում է առաջիկա օրերին հնարավոր լուրջ էսկալացիայի՝ համարելով, որ շաբաթվա վերջը կարող է վճռորոշ լինել տարածաշրջանային իրավիճակի զարգացման տեսանկյունից։

Մեծ Բրիտանիայի արտաքին գործերի նախարարությունը նաև հայտնել է, որ հուլիսի 8-ից ի վեր տարածաշրջանում շարունակվել են Իրանի կողմից ԱՄՆ ռազմական և քաղաքացիական ենթակառուցվածքների դեմ հարվածներն ու պատասխան գործողությունները, ինչի հետևանքով պահպանվում է նոր հարձակումների և հակամարտության ընդլայնման վտանգը։

Բրիտանական իշխանությունները Մերձավոր Արևելքում գտնվող իրենց քաղաքացիներին խորհուրդ են տվել պատրաստ լինել ավիաչվերթների հնարավոր չեղարկումների, օդային տարածքի ժամանակավոր փակման և ճանապարհորդական այլ խափանումների։