Առողջության համընդհանուր ապահովագրությունը աղքատության նվազեցման հնարավորություն է. Բաթոյան

Առողջության համընդհանուր ապահովագրության համակարգը շատ կարևոր է ոչ միայն ֆինանսական իմաստով, այլև կյանքի որակի: Կարևոր է, որ մենք փոխենք մեր առողջության մասին հոգ տանելու մշակույթը: Այս համակարգի ներդրումն էապես կարող է նվազեցնել երկրում աղքատությունը. սա ես չեմ ասում, մասնագետներն են նշում: Այս մասին Ազգային ժողովի այսօրվա նիստին ասել է «Քաղաքացիական պայմանագիր» խմբակցության պատգամավոր Զարուհի Բաթոյանը:

«Առողջապահության ապահովագրությունն ամենաէական ազդեցությունը կարող է ունենալ հենց այս ոլորտում, և որևէ մեկի համար գաղտիք չէ, որ հատկապես տարեցների, հաշմանդամություն ունեցող անձանց կամ խոցելի խմբերի դեպքում նրանց ընտանեկան կամ անձնական բյուջեի էական մասն ուղղվում է հենց առողջապահական ծառայություններին:

Կարծում եմ՝ սա էական փոփոխություն է, և հենց այս իմաստով եմ նշում, որ սա սոցիալական ոլորտում շատ կարևոր առաջընթաց է: Էլ չեմ խոսում այն մասին, որ երբ քաղաքացիները պատահաբար և հանկարծակի են հայտնաբերում առողջական խնդիրներ, դա էլ նրանց կանգնեցնում է լուրջ պրոբլեմի առջև հենց միանգամից: Նույնիսկ միջին աշխատավարձ ստացող քաղաքացիների դեպքում դա կարող է բերել աղքատության կամ սոցիալական լուրջ խնդիրների»,- ասել է պատգամավորը: