Վրաստանի կողքին տեսնում ենք նաև, թե ինչ է տեղի ունենում Հայաստանի և Ադրբեջանի միջև. Ռյուտտե

ՆԱՏՕ-ի գլխավոր քարտուղար Մարկ Ռյուտտեն «Ազատություն» ռադիոկայանին տված հարցազրույցում հայտարարել է, որ դաշինքը լրջորեն անհանգստացած է Վրաստանում վերջին զարգացումներով։

Նրա խոսքով՝ իրավիճակը գնահատելիս ինքը «միամիտ չէ» և Վրաստանի ղեկավարությանը հստակ փոխանցել է ՆԱՏՕ-ի մտահոգությունները։

«Մենք շատ անհանգիստ ենք, և սա բացահայտ ասել ենք վրացական կողմին։ Մենք համագործակցում ենք նրանց հետ, և ես կարծում եմ, որ այդ համագործակցությունն ապահովում է մի ալիք, որի միջոցով մենք կարող ենք արտահայտել մեր մտահոգությունները։ Պետք է դիտել իրավիճակը տարածաշրջանային լայն համատեքստում․ Վրաստանի կողքին տեսնում ենք նաև, թե ինչ է տեղի ունենում Հայաստանի և Ադրբեջանի միջև։ Այնտեղ իրավիճակը բարելավվել է, այդ թվում՝ նախագահ Թրամփի ջանքերի շնորհիվ։ Այդ պատճառով ես կցանկանայի Վրաստանը դիտարկել Հարավային Կովկասի ավելի լայն համատեքստում»,- ասել է Ռյուտտեն։