Ուկրաինան ընդունել է ամերիկյան խաղաղության ծրագրի փոփոխությունները․ Զելենսկի
Ուկրաինայի նախագահ Վլադիմիր Զելենսկին դրականորեն անդրադարձել է Ռուսաստանի հետ պատերազմն ավարտելու նպատակով ներկայացված ամերիկյան 28 կետանոց խաղաղության ծրագրում արված փոփոխություններին, փոխանցում է BBC-ն։ Նա սոցիալական ցանցում գրել է, որ այժմ պատերազմի ավարտի համար անհրաժեշտ քայլերի ցուցակը կարող է դառնալ իրագործելի։
Սպիտակ տունը հայտնել է, որ ԱՄՆ-ն հավասարապես աշխատում է երկու կողմերի հետ՝ խաղաղություն հաստատելու ուղղությամբ։ Վաշինգտոնի առաջարկած ուկրաինական կարգավորման ծրագիրը ներառում էր Ռուսաստանի կողմից որոշ ուկրաինական տարածքների ճանաչում, ուկրաինական բանակի նկատմամբ սահմանափակումներ, մի քանի գոտիների ապառազմականացում և Կիևի կողմից օտարերկրյա զորքերի տեղակայման մերժում։
Հավելենք՝ ԱՄՆ-ն և Ուկրաինան հայտարարել էին, որ Ժնևում կայացած բանակցությունների ընթացքում «զգալի առաջընթաց» է արձանագրվել խաղաղության նոր պլանի շուրջ։ Համատեղ հայտարարությունում նշվում էր, որ նախնական տարբերակում կատարվել են որոշ փոփոխություններ։
