Ուկրաինային տրված նոյեմբերի 27-ի վերջնաժամկետը փոփոխական է. Մարկո Ռուբիո

CNN-ի փոխանցմամբ՝ ԱՄՆ պետքարտուղար Մարկո Ռուբիոն ասել է, որ նախագահ Դոնալդ Թրամփի սահմանած նոյեմբերի 27-ի վերջնաժամկետը, որի ընթացքում Ուկրաինան պետք է ընդունի ԱՄՆ-ի խաղաղության առաջարկը, փոփոխական է։ Ռուբիոն նշել է, որ իրենց ցանկությունն է գործընթացը հնարավորինս շուտ ավարտել։

«Մեր ուզած վերջնաժամկետը հնարավորինս շուտ ավարտելն է։ Ակնհայտ է, որ մենք կցանկանայինք, որ դա լինի հինգշաբթի օրը: Մենք իսկապես առաջ ենք շարժվել, ուստի ես շատ լավատես եմ, որ դրան կհասնենք շատ խելամիտ ժամանակահատվածում, շատ շուտով», — ասել է Ռուբիոն Ժնևում։

Նրա խոսքով՝ ԱՄՆ-ը ընդունում է, որ Ուկրաինան պետք է ունենա անվտանգության երաշխիքներ՝ որպես խաղաղության առաջարկի մաս, սակայն նա չի ներկայացրել քննարկումների մանրամասները։

«Անկախ նրանից՝ հինգշաբթի է, ուրբաթ է, չորեքշաբթի է, թե հաջորդ շաբաթվա երկուշաբթի է, մենք ուզում ենք, որ դա շուտով լինի, որովհետև մարդիկ են մահանում», — նշել է Ռուբիոն։