Զելենսկին ԵՄ ղեկավարների հետ քննարկել է ԱՄՆ առաջարկները
Ուկրաինայի նախագահ Վլադիմիր Զելենսկին հայտնել է, որ ԵՄ խորհրդի նախագահ Անտոնիու Կոշտային և ԵՄ հանձնաժողովի նախագահ Ուրսուլա ֆոն դեր Լայենին ներկայացրել է ԱՄՆ կողմից շրջանառվող առաջարկները, որոնք վերաբերում են պատերազմի ավարտին։ Զելենսկին հաղորդագրություն է տարածել իր Telegram ալիքում՝ ամփոփելով քննարկումների հիմնական շեշտադրումները։
Նրա խոսքով՝ եվրոպական և ամերիկյան գործընկերների հետ շարունակվում են խորհրդակցությունները՝ միավորված մոտեցում ձևավորելու նպատակով։ Զելենսկին ընդգծել է, որ Կիևը գնահատում է ԱՄՆ-ի և նախագահ Դոնալդ Թրամփի պատրաստակամությունը՝ նպաստելու հակամարտության ավարտին։
Քննարկումները տեղի են ունենում խաղաղ նախաձեռնության տարբեր տարբերակների ուսումնասիրման փուլում, երբ Ուկրաինան և դաշնակիցները փորձում են համաձայնեցնել ընդհանուր դիրքորոշումը՝ հետագա բանակցությունների համար։ Կիևը հայտարարում է, որ ձգտում է ապահովել միջազգային գործընկերների սերտ համագործակցությունը առաջարկվող ծրագրի շուրջ։
Հավելենք՝ Ուկրաինայի նախագահը հեռախոսազրույց է ունեցել ՆԱՏՕ-ի գլխավոր քարտուղար Մարկ Ռյուտեի հետ:
