Մենք կորոշենք՝ որն է բանակցությունների անցկացման ամենահարմար ձևաչափը․ Ելիսեյան պալատ

Ելիսեյան պալատը առաջիկա օրերին կդիտարկի Ֆրանսիայի նախագահ Էմանուել Մակրոնի և Ռուսաստանի նախագահ Վլադիմիր Պուտինի միջև բանակցությունների կազմակերպման հնարավորությունը։ Այդ մասին հայտնել է AFP գործակալությունը՝ հղում կատարելով Ֆրանսիայի նախագահի աշխատակազմին։

«Այն, որ Կրեմլում հավանություն են տվել այդ քայլին, դրական է։ Առաջիկա օրերին մենք կորոշենք, թե որն է բանակցությունների անցկացման ամենահարմար ձևաչափը»,- Ելիսեյան պալատի ներկայացուցչի խոսքերը փոխանցել է գործակալությունը։

Ավելի վաղ Էմանուել Մակրոնը Բրյուսելում Եվրամիության գագաթնաժողովի արդյունքներով հայտարարել էր, որ եկել է ժամանակը, որպեսզի Եվրոպան վերսկսի երկխոսությունը Ռուսաստանի հետ։ Նա նշել էր, որ Ուկրաինայի հարցով բանակցությունների գործող ձևաչափը, երբ ամերիկյան բանակցողները կարգավորման պայմանները քննարկում են Ռուսաստանի հետ առանց եվրոպական կողմի մասնակցության, արդյունավետ չէ։

Այդ հայտարարությունից հետո ՌԴ նախագահի մամուլի քարտուղար Դմիտրի Պեսկովը հայտնել էր, որ Վլադիմիր Պուտինը պատրաստ է երկխոսության Էմանուել Մակրոնի հետ։