Գալուզինը Մուստաֆաևի հետ քննարկել է Ռուսաստանի դերը Հայաստան–Ադրբեջան բանակցություններում

ՌԴ ԱԳՆ-ի փոխանցմամբ՝ նոյեմբերի 21-ին Ռուսաստանի փոխարտգործնախարար Միխայիլ Գալուզինը հանդիպել է Ռուսաստանում Ադրբեջանի արտակարգ և լիազոր դեսպան Ռահման Մուստաֆաևին։ Հանդիպման ընթացքում կողմերը վերահաստատել են իրար հանձնառությունը զարգացնելու երկկողմ հարաբերությունները՝ հիմք ընդունելով 2022 թվականի փետրվարի 22-ին Մոսկվայում ստորագրված դաշնակցային համագործակցության վերաբերյալ հռչակագիրը։ Քննարկվել է բարձր մակարդակի շփումների ժամանակացույցը, ընդգծվել են տնտեսական համագործակցության առաջընթացը և մշակութային ու մարդասիրական կապերի լիարժեք վերականգնման կարևորությունը։

Ռուսական կողմը շեշտել է հունիսի 30-ից հուլիսի 1-ը Բաքվում կալանավորված 11 ռուս քաղաքացիների արագ ազատ արձակման անհրաժեշտությունը՝ դիտարկելով այն որպես երկկողմ հարաբերությունների կարգավորման նշանակալի քայլ։

Քննարկվել են նաև տարածաշրջանային թեմաներ, այդ թվում՝ Ադրբեջանի և Հայաստանի հարաբերությունների կարգավորման գործում Ռուսաստանի հնարավոր աջակցությունը՝ հիմնված 2020-2022 թվականներին ձեռք բերված եռակողմ համաձայնագրերի վրա։ Օրակարգում են նաև 3+3 տարածաշրջանային համագործակցության հարթակի անխափան աշխատանքի պահպանման հետ կապված հարցերը։