Ուկրաինայի խաղաղ գործընթացը կախված է ԵՄ դիրքորոշումից. Կալլաս

Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասն ընդգծել է, որ Ուկրաինային վերաբերող ցանկացած խաղաղ պայմանագիր կարող է առաջ գնալ միայն այն դեպքում, եթե ստանա Եվրոպական միության աջակցությունը։

Նրա խոսքով՝ ԵՄ նախարարները հանգիստ են արձագանքել վերջին հաղորդագրություններին, քանի որ նման առաջարկներ արդեն եղել են, սակայն առանց եվրոպական և ուկրաինական կողմերի համաձայնության դրանք կենսունակ չեն։

Կալլասը նշել է, որ քննարկումների առաջնային թեման եղել է ոչ թե նոր նախաձեռնությունների բովանդակությունը, այլ այն, թե ինչ քայլեր է ձեռնարկում Եվրամիությունը և ինչ ուղղությամբ է պատրաստվում շարունակել իր քաղաքականությունը։

Կալլասն ընդգծել է՝ ԵՄ երկրների մոտեցումը մնում է անփոփոխ․ խաղաղ գործընթացը պետք է հիմնված լինի Ուկրաինայի ինքնիշխանության և անվտանգության ապահովման վրա, և առանց դրա որևէ առաջարկ չի կարող իրականություն դառնալ։