«Հայաքվե»-ի դիտորդների թվի խախտման փորձը տեղամասում
Infocom-ը հայտնում է, որ «Հայաքվե» դիտորդական առաքելությունը փորձել է խախտել ընտրական օրենսգրքի պահանջը՝ գերազանցելով քվեարկության սենյակում թույլատրելի դիտորդների թիվը։ Ընտրական օրենսգրքի համաձայն՝ յուրաքանչյուր դիտորդական առաքելություն իրավունք ունի ունենալ մինչև երկու դիտորդ։
Նշված աղբյուրի փոխանցմամբ՝ թիվ 14/8 տեղամասում, որտեղ արդեն գրանցված էին «Հայաքվե»-ի երկու դիտորդները, հանձնաժողովի քարտուղարին է մոտեցել կազմակերպության երրորդ անդամը։ Երբ հանձնաժողովը հիշեցրել է սահմանված երկու դիտորդների մասին, երրորդը հայտարարել է, որ «շրջիկ է» և մի քանի րոպե մնալուց հետո հեռացել է։
Մինչ այս միջադեպը՝ նույն կազմակերպությունից մեկ այլ դիտորդ ևս եկել էր տեղամաս, երբ այնտեղ արդեն երկու դիտորդ ներկա էին։ Նա զրուցել էր իրենց ներկայացուցիչների հետ, մի քանի րոպե մնացել և հեռացել՝ առանց գրանցվելու։
