«Բարսելոնայի» նախագահը՝ Մեսսիի վերադարձի մասին

«Բարսելոնայի» նախագահ Ժոան Լապորտան հայտարարել է, որ չի իմացել Լեո Մեսսիի անակնկալ այցի մասին, սակայն այն համարում է «սպոնտան և բարսելոնական քայլ»։ Այս մասին գրում է Sport.es-ը։

Լապորտան հարցազրույց է տվել Catalunya Ràdio-ի «El Matí» հաղորդմանը՝ անդրադառնալով ակումբի ներկա իրավիճակին և Մեսսիի վերջին այցին Spotify Camp Nou։

«Լավ, գիտեմ՝ ինչպես եղավ դա։ Դա սպոնտան, բարսելոնական քայլ էր։ Ես դրա մասին չգիտեի»,- ասել է Լապորտան՝ հավելելով, որ Մեսսին միշտ կարող է վերադառնալ, քանի որ «Կամպ Նոուն նրա տունն է»։

Նրա խոսքով՝ Մեսսիի քայլը եղել է անկեղծ և բնական, իսկ իր համար՝ հաճելի անակնկալ։

«Մեր հարաբերությունները նորմալ են։ Այստեղ մենք նրան սիրում ենք, սա նրա տունն է, և նա դա գիտի։ Միշտ ասել ենք՝ արդար է, որ նա ստանա աշխարհի ամենագեղեցիկ հարգանքի արարողությունը։ Կարծում եմ՝ դա հիասքանչ կլինի»,- նշել է Լապորտան։

«Մենք աշխատում ենք, որպեսզի այստեղ անցկացվեն հանդիպումներ, և այդ շրջանակում կցանկանայի, որ տեղի ունենար հարգանքի արարողություն աշխարհի լավագույն ֆուտբոլիստի համար։ Գիտեմ, որ դա կուրախացնի նաև նրան։ Չնայած ամեն ինչ չընթացավ այնպես, ինչպես կուզեինք, եթե հարգանքի արարողությունը կարող է փոխհատուցել դա, ուրախ կլինենք»,— ավելացրել է նա։