Խանդանյանը՝ Ղազախստանից ներմուծված ցորենի մասին

«Քաղաքացիական պայմանագիր» խմբակցության պատգամավոր Սարգիս Խանդանյանը ծիծաղելի է որակել ընդդիմության հայտարարությունները Ղազախստանից ներկրված ցորենի վերաբերյալ։

Լրագրողների հետ զրույցում նա անդրադարձել է ընդդիմադիրների քննադատություններին՝ նշելով, որ Ղազախստանի կողմն արդեն պաշտոնապես պարզաբանել է արտահանվող ցորենի կարգը։

«Ըստ էության, դա ցորեն է, որն օգտագործվելու է հացի արտադրության մեջ։ Չեմ ուզում գնահատական տալ, բայց ընդդիմության լաբորատոր փորձաքննության եզրահանգումներն են արժանի ծաղրի ու քամահրանքի»,– նշել է պատգամավորը։

Լրագրողների հարցին, թե Էկոնոմիկայի փոխնախարարը չի հերքել, որ ներկրված ցորենը կարող է անասնակեր լինել, Խանդանյանը պատասխանել է․ «Ես պետք է լսեմ Էկոնոմիկայի փոխնախարարի ասածը, որպեսզի մեկնաբանեմ։ Ինչպես գիտեք՝ ես ցորենի մասնագետ չեմ։ Կան տարբեր կարիքներ, ենթադրում եմ՝ Հայաստանը իր տարբեր կարիքների համար է ներկրում ապրանքներ»։