Չեմ հավատում, որ Հայաստանի ղեկավարությունը կարող է Արցախի ճակատագիրը անորոշ դարձնել․Դավիթ Բաբայան

Մենք ողջունում ենք, որ Հայաստանի նոր իշխանություններն ավելի շատ են խոսում այն մասին, թե Արցախը պետք է վերադառնա բանակցային գործընթացի սեղանի շուրջ: Այս մասին ֆեյսբուքյան իր էջում գրել է Արցախի նախագահ Բակո Սահակյանի մամլո խոսնակ Դավիթ Բաբայանը։ Գրառման մեջ ասվում է․ «Բայց մենք հենց առաջին օրվանից էլ ասել ենք՝ այո, ողջունելի է այդ տեսակետը, սակայն սա բարդ գործընթաց է՝ աշխատատար և ժամանակատար: Հաշվի առնելով, որ Ադրբեջանը երբևէ չի համաձայնի, որպեսզի վերականգնվի լիարժեք ձևաչափը, և դրա համար ամեն ինչ անելու է, բայց դա չի նշանակում, որ մենք պետք է հրաժարվենք այդ գործընթացից: Այնպես որ, մենք ողջունում ենք ցանկացած հանդիպում Հայաստանի և Ադրբեջանի ղեկավարության միջև, որովհետև այն դիտարկում ենք՝ որպես բանակցային գործընթացի շարունակականություն և տարածաշրջանում կայունություն ու խաղաղություն պահպանելու միջոց: Եվ ես չեմ հավատում, որ Հայաստանը և Հայաստանի ղեկավարությունը կարող է Արցախի նկատմամբ քայլեր ձեռնարկել, որը կարող է մեր ճակատագիրը անորոշ դարձնել, որովհետև դա կնշանակի ինքնասպանություն նաև հայոց պետականության համար: Իսկ մենք երբևէ չպետք է վախենանք, մտահոգվենք, որ մեզ կարող են ինչ-որ բան պարտադրել, դա կարող է լինել միայն մի դեպքում, եթե մենք սխալ արտաքին քաղաքականություն վարենք, եթե պառակտվի հայությունը կամ Հայաստան-Արցախ Սփյուռք եռամիասնությունը ուժեղ չլինի, կամ մեր բանակը թուլանա»: